жарыя оферта

«BARS» мессенджеринин колдунуучулук келишими

Кыргыз Республикасы, Бишкек ш.  ·  Редакциянын жарыяланган күнү: 2026-жылдын 1-ноябры

«Кикшеринг Борбордук Азия» Ачык акционердик коому (мындан ары – «Компания») ушул Келишимдин талаптарына жооп берген, аракетке жөндөмдүү болгон ар бир жеке жакка төмөндө көрсөтүлгөн шарттарда «BARS» мессенджеринин Колдонуучулук келишимин түзүүнү сунуштайт.

1. ЖАЛПЫ ЖОБОЛОР

1.1

Ушул Келишим Кыргыз Республикасынын Граждандык кодексинин 398-беренесинин 2-пунктуна ылайык жарыя оферта болуп саналат, ошондой эле Кыргыз Республикасынын Санарип кодексинин 114-беренесине ылайык колдонуучу келишими болуп эсептелет.

1.2

Ушул Келишим Компаниянын Колдонуучуга Сервиске жеткиликтүүлүк берүү шарттарын, ошондой эле Компаниянын жана Колдонуучунун укуктарын, милдеттерин жана жоопкерчилигин жөнгө салат (мындан ары биргелешип — «Тараптар», өз-өзүнчө — «Тарап»).

1.3

Келишим электрондук формада түзүлөт. Келишимдин электрондук формасы Кыргыз Республикасынын Граждандык кодексинин 176-беренесинин 1-пунктуна жана 395-беренесинин 2-пунктуна ылайык Тараптар тарабынан жазуу жүзүндөгү форма катары таанылат. Келишимди кагаз жүзүндө кол коюу талап кылынбайт.

1.4

Келишимдин ажырагыс бөлүгү болуп төмөнкүлөр саналат (мындан ары биргеликте – «Тиркемелер»):

  • а)1-Тиркеме – Купуялуулукту сактоо жана персоналдык маалыматтарды иштеп чыгуу саясаты (мындан ары – «Саясат»);
  • б)2-Тиркеме – Сервисти колдонуу эрежелери (мындан ары – «Эрежелер»);
  • в)3-Тиркеме – Кайрылууларды, даттанууларды жана талаш-тартыштарды кароо тартиби (мындан ары – «Кайрылууларды кароо тартиби»);
  • г)4-Тиркеме – Жасалма интеллект системаларын колдонуу жөнүндө маалыматтар (мындан ары – «ЖИ жөнүндө маалыматтар»);
  • д)5-Тиркеме – Жеке макулдуктардын формалары (мындан ары – «Макулдуктардын формалары»).
1.5

Эгерде текстте башкача түшүндүрмө берилбесе, Келишимге болгон ар бир шилтеме бардык Тиркемелерге болгон шилтемени камтыйт. Келишимдин негизги тексти менен Тиркеменин ортосунда карама-каршылык болгон учурда, персоналдык маалыматтарды иштеп чыгуу маселелеринен тышкары (бул маселелер боюнча Саясат артыкчылыкка ээ), Келишимдин негизги тексти колдонулат.

1.6

5-Тиркемеде каралган жеке макулдуктар Келишимди түзүүнүн шарты болуп эсептелбейт. Колдонуучу алардын ар бирин өз каалоосу боюнча берет же бербейт. Жеке макулдуктан баш тартуу Сервистин ошол макулдукту талап кылган функциясын колдоно албоого гана алып келет.

1.7

Келишим Кыргыз Республикасынын мамлекеттик жана расмий тилдеринде түзүлгөн. Эки тилдеги тексттер тең бирдей күчкө ээ. Компания Кыргыз Республикасынын Санарип кодексинин 114-беренесинин 6-бөлүгүнө ылайык, Келишимдин текстинин автоматтык котормосун жүргүзүү мүмкүнчүлүгүн камсыз кылат.

1.8

Бөлүмдөрдүн жана пункттардын аталыштары колдонууга ыңгайлуу болуш үчүн гана колдонулат жана Келишимди чечмелөөгө таасир этпейт. Бирликтеги сөздөр көптүк түрдү, ал эми көптүк түрдөгү сөздөр бирлик түрдү камтыйт, эгерде контекстте башкача болбосо.

1.9

«Анын ичинде», «мисалы» деген сөздөр «анын ичинде, бирок бул менен чектелбейт» деген маанини билдирет. Келишимде мындай сөздөрдөн кийин келген тизмелер толук эмес болушу мүмкүн.

2. КОМПАНИЯ ЖАНА СЕРВИС ТУУРАЛУУ МААЛЫМАТТАР

2.1

Кыргыз Республикасынын Санарип кодексинин 33-беренесинин 2-бөлүгүнө ылайык, Компания өзү жана Сервис жөнүндө төмөнкү маалыматтарды билдирет:

  • а)Компаниянын аталышы: «Кикшеринг Борбордук Азия» Ачык акционердик коому (ОАО «Кикшеринг Борбордук Азия»);
  • б)Компаниянын юридикалык дареги: Кыргыз Республикасы, Бишкек ш., Биринчи май району, Кулатов көч., 61, 5-кабат, 501-бөлмө;
  • в)Мамлекеттик каттоо жөнүндө маалыматтар: каттоо номери 300144-3301-ЗАО, идентификациялоочу салык номери (ИСН) 00103202410032, ОКПО коду 32655398, алгачкы мамлекеттик каттоо күнү – 2024-жылдын 1-марты;
  • г)Компанияга түз кайрылуу үчүн байланыш маалыматтары: электрондук почта дареги info@kicksharing.asia, телефон + 996 220 95 45 45;
  • д)Колдонулуучу мыйзамдар: Кыргыз Республикасынын Санарип кодекси, Кыргыз Республикасынын Граждандык кодекси жана Кыргыз Республикасынын башка мыйзамдары;
  • е)Сервиске туташуу үчүн зарыл болгон чаралар: Түзмөккө Тиркемени орнотуу, Интернет тармагына туташуунун болушу, Келишимдин 6.2-пунктунда көрсөтүлгөн Телефон номеринин болушу жана Келишимдин 6-бөлүмүндө көрсөтүлгөн тартипте Каттоодон өтүү;
  • ж)Сервисти колдонуудагы учурдагы чектөөлөр: Келишимдин 5.4–5.5, 6.2, 7.3, 7.6 пункттарында, 10-бөлүмүндө жана Эрежелерде көрсөтүлгөн.
2.2

Компания, Кыргыз Республикасынын Санарип кодексинин маанисинде, санарип сервисин берүүчү жана Сервисти көрсөтүү учурунда персоналдык маалыматтарга карата иштеп чыгарылган персоналдык жазуулардын ээси болуп саналат.

2.3

Компания Сервисти көрсөтүү үчүн үчүнчү тараптарды, анын ичинде Иштеп чыгуучуларды, Укук ээсин жана Компаниянын аффилиацияланган жактарын тартууга укуктуу. Компания Иштеп чыгуучулардын аракеттери үчүн, өз аракеттери сыяктуу эле Келишим жана мыйзамдар менен белгиленген чекте Колдонуучунун алдында жооптуу болот.

2.4

Келишимдин 2.1-пунктунда көрсөтүлгөн маалыматтар Сайтта жана Тиркеменин «Тиркеме жөнүндө» бөлүмүндө да жайгаштырылат. Бул маалыматтар өзгөргөн учурда, Компания Келишимдин 23-бөлмөсүндө каралган тартипти сактабай эле аларды жаңылайт.

3. ТҮШҮНҮКТӨР ЖАНА АНЫКТАМАЛАР

3.1

Келишимде баш тамга менен берилген терминдердин маанилери төмөндө көрсөтүлгөн. Келишимде аныкталбаган терминдер, Кыргыз Республикасынын мыйзамдарына ылайык, ал эми мыйзамдарда андай термин жок болгон учурда - анын жалпы маанисине ылайык чечмеленет.

3.2

Акцепт — Колдонуучу тарабынан Келишимдин шарттарын Келишимдин 5.1-пунктунда көрсөтүлгөн ыкма менен толук жана эч кандай шартсыз кабыл алуу.

3.3

Верификация — «Түндүк» мамлекеттик системасын жана ага байланыштуу мамлекеттик идентификациялоо сервистерин (мындан ары – «Түндүк») же Компания Сервиске туташтыра турган башка идентификациялоо системасын колдонуу менен Колдонуучунун өздүгүн тастыктоо.

3.4

Верификациядан өткөн колдонуучу — Верификациядан ийгиликтүү өткөн Колдонуучу.

3.5

Топ (Группа) — Сервистеги эки жана андан көп Колдонуучулардын катышышында, анын ичине Топ түзүүчүнү кошкондо, Топ түзүүчү тарабынан түзүлгөн чат. Топто жеке чатта жок функциялар, анын ичинде аталыш жана сүрөт берүү, катышуучуларды кошуу жана чыгаруу, катышуучулардын ортосунда укуктарды бөлүштүрүү, ошондой эле Тиркеменин функционалында каралган башка функциялар жеткиликтүү болушу мүмкүн.

3.6

Мыйзамдар — Кыргыз Республикасынын мыйзамдары, анын ичинде Кыргыз Республикасы катышуучу болуп турган жана ал үчүн күчүнө кирген эл аралык келишимдер.

3.7

Чалуу — Сервисти колдонуу менен Колдонуучулардын ортосундагы үн байланышы же видео байланышы.

3.8

Инцидент — Санарип жазуулардын толук эместигине, ишенимсиздигине, актуалдуу эместигине, жеткиликсиздигине же Сервистин кызмат берүүсүнүн бузулушуна алып келген окуя же аракет.

3.9

Ырастоо коду — Каттоо үчүн же Эсептик жазууга кирүү үчүн SMS-билдирүү аркылуу Телефон номерине жөнөтүлгөн бир жолку Санарип коду.

3.10

Ачык кодтуу компонент — Программанын курамына кирген жана анын укук ээси тарабынан эркин (ачык) лицензиянын шарттарында таратылган программалык компонент.

3.11

Колдонуучунун контенти — Колдонуучу Сервисти колдонуу менен түзгөн, жүктөгөн, жөнөткөн же башка жол менен жайгаштырган ар кандай Билдирүүлөр, сүрөттөр, үн жазуулары, тексттер, аты, Аватар жана башка материалдар.

3.12

Аватар — Колдонуучу өз профилинде жайгаштырган сүрөт.

3.13

Метадайындар — Сервистин колдонулушун сүрөттөгөн, бирок Билдирүүлөрдүн мазмунун ачпаган маалыматтар: жөнөтүүчү жана алуучу жөнүндө маалыматтар, жөнөтүлгөн күнү жана убактысы, IP-дареги, Түзмөктүн модели, авторизациялоонун фактылары жана натыйжалары, ошондой эле Саясатта көрсөтүлгөн башка маалыматтар.

3.14

Кирүү мүмкүнчүлүгүн калыбына келтирүү механизми — Компания тарабыдан криптографиялык ачкычтарды корголгон түрдө сактоо (депонирлөө) үчүн колдонулуучу техникалык каражат, ал Келишимдин 8-бөлүмүндө каралган учурларда жана тартипте шифрленген Билдирүүлөргө кирүү мүмкүнчүлүгүн калыбына келтирүүгө мүмкүндүк берет.

3.15

Телефон номери — Колдонуучу тарабынан Каттоо жана Эсептик жазууга кирүү үчүн колдонулуучу мобилдик байланыш абоненттик номери.

3.16

Иштеп чыгуучу (Обработчик) — Компания тарабынан Санарип жазууларды иштеп чыгуу, Санарип технологиялык тутумдарды эксплуатациялоо же Сервистин айрым функцияларын көрсөтүү тапшырмасын алган жак, анын ичинде маалыматтарды иштеп чыгуу борборунун кызмат көрсөтүүчүсү, SMS-билдирүүлөрдү жөнөтүү оператору жана ЖИ функцияларынын Провайдери.

3.17

Акы төлөнүүчү функциялар — Сервистин 16-бөлүмүнө ылайык Компания тарабынан жарыяланган шарттарда акы төлөнүүчү функциялары.

3.18

Колдонуучу — Акцептти жасаган, ошондой эле Эсептик жазууну колдонуу менен Сервиске кирүү мүмкүнчүлүгүн ишке ашырган жеке жак.

3.19

ЖИ функцияларынын провайдери — үчүнчү жак, анын жасалма интеллект системалары ЖИ Функцияларынын иштеши үчүн колдонулат, ал тууралуу маалыматтар 4-Тиркемеде келтирилген.

3.20

Укук ээси — Программага же анын айрым компоненттерине өзгөчө укуктары бар жак, анын ичинде Компания же Компанияга Программаны колдонуу укугун берген жак.

3.21

BARS тиркемеси (Тиркеме) — мобилдик түзмөктөр үчүн «BARS» тиркемеси, Сервиске кирүү мүмкүнчүлүгүн берүүчү жана анын жаңыланган версияларын камтыйт. Келишимдин 1.4-пунктунун (1–5-Тиркемелер) маанисинде «Тиркеме» термини номерин көрсөтүү менен колдонулат.

3.22

Программа — BARS программасы, Сервистин сервердик программалык камсыздоосу, алардын курамдык бөлүктөрү, маалыматтар базасы, интерфейстер, дизайн, графикалык элементтер, стикерлер топтомдору жана Сервисти көрсөтүү үчүн колдонулуучу башка интеллектуалдык менчик объекттери.

3.23

Каттоо — Келишимдин 6-бөлүмүндөгү тартипте Эсептик жазууну түзүү процедурасы.

3.24

Сайт — Компаниянын интернеттеги https://bars.kg дарегиндеги сайты, анын поддомендерин камтыйт.

3.25

Сервис (BARS мессенджери) — Программаны колдонуу менен Компания тарабынан көрсөтүлгөн, Колдонуучуларга Билдирүүлөр менен алмашууга, Чалууларды жүргүзүүгө, Топторго катышууга жана Тиркемеде жеткиликтүү болгон башка функцияларды колдонууга мүмкүндүк берүүчү Санарип сервиси.

3.26

Колдоо кызматы — Компаниянын бөлүмү же ал тарабынан тартылган, Колдонуучулардын кайрылууларын Келишимдин 2.1-пунктунда жана Кайрылууларды кароо тартибинде көрсөтүлгөн каналдар аркылуу кабыл алып, караган жак.

3.27

Топ түзүүчү — Топту түзгөн Колдонуучу.

3.28

Билдирүү — Колдонуучу башка Колдонуучуга, Топко өткөрүп жаткан же Каналга Сервис аркылуу жарыялаган тексттик билдирүү, үн билдирүүсү, сүрөт, видеожазуу, стикер же башка маалымат.

3.29

Түзмөк — Колдонуучу Тиркемени орноткон смартфон же башка Санарип түзмөк.

3.30

Эсептик жазуу — Каттоо учурунда түзүлүүчү, Колдонуучу жөнүндө маалыматтардын жана анын жөндөөлөрүнүн жыйындысы болуп саналат жана Колдонуучуга Сервисти пайдаланууга мүмкүндүк берет.

3.31

ЖИ функциялары — жасалма интеллект тутумдарын колдонуу менен иштеген Сервистин функциялары, анын ичинде үн билдирүүлөрүн текстке айландыруу (транскрибация) жана Билдирүүлөрдү кыргыз жана орус тилдерине которуу.

3.32

Иш күнү — Мыйзамдарга ылайык дем алыш же иш эмес майрамдык күн болбогон күн.

3.33

Эсептөө көрсөткүчү — Мыйзамдарда белгиленген жана тийиштүү милдеттенүүнү аткаруу күнүндө колдонулуучу эсептөө көрсөткүчү.

3.34

Ыйгарым укуктуу орган — Мыйзамдарга ылайык Компаниядан аракеттерди жасаганды же маалыматтарды бергенди, анын ичинде тармактык жөнгө салуучу, талап кылууга укугу бар мамлекеттик орган, сот же башка орган.

3.35

Канал — Сервисте маалыматты жайылтуу ыкмасы, мында Канал ээси Билдирүүлөрдү чексиз Жазылуучулар үчүн жарыялайт, ал эми Жазылуучулар, эгерде Канал ээси Тиркеменин функционалынын алкагында башкача белгилебесе, аларды жарыялоо укугусуз окушат.

3.36

Канал ээси — Каналды түзгөн Колдонуучу, ошондой эле Канал ээсинин ыйгарым укуктары Тиркеменин функционалында же Келишимдин 10.15-пунктунда каралган тартипте берилген жак.

3.37

Жазылуучу (Подписчик) — Каналга катталган (жазылган) Колдонуучу.

3.38

Жок болуп кетүүчү билдирүү — чатта таймер тарабынан белгиленген мөөнөт бүткөндөн кийин автоматтык түрдө өчүрүлүүчү Билдирүү.

4. КЕЛИШИМДИН ПРЕДМЕТИ

4.1

Компания Колдонуучуга Сервиске кирүү мүмкүнчүлүгүн жана Келишимдин 14-бөлүмүндө көрсөтүлгөн көлөмдө жана шарттарда «BARS» Тиркемесин колдонуу укугун берет, ал эми Колдонуучу Сервисти ушул Келишимге жана Мыйзамдарга ылайык колдонууну милдеттенет.

4.2

Сервиске кирүү мүмкүнчүлүгү Акы төлөнүүчү функциялардан тышкары, акысыз берилет. Интернет тармагына туташуу чыгымдарын жана байланыш кызматтары үчүн акыны Колдонуучу өзүнүн байланыш операторунун тарифтерине ылайык өз алдынча төлөйт.

4.3

Сервис Колдонуучу аны колдонгон учурдагы Тиркемеде жеткиликтүү болгон функциялардын түрүндө жана көлөмүндө берилет. Эгерде Келишимде мындай убада түздөн-түз берилбесе, Компания Сервистин конкреттүү Колдонуучунун күтүүлөрүнө же максаттарына жооп берерин кепилдик бербейт.

4.4

Компания Билдирүүлөрдү алмашуу жана Чалууларды жүргүзүү үчүн техникалык мүмкүнчүлүктү камсыз кылат. Компания, атүгүл алар Сервисти колдонуу менен ишке ашырылган болсо да, Колдонуучулардын ортосундагы мамилелердин, макулдашуулардын жана келишимдердин тарабы, катышуучусу, ортомчусу же кепилдиги болуп саналбайт.

4.5

Компания Колдонуучулардын Билдирүүлөрүнүн мазмунун түзбөйт жана өзгөртпөйт, алардын алуучуларын тандабайт жана өткөрүлүп жаткан маалыматтардын мазмунун көзөмөлдөбөйт. Колдонуучунун Контентин өткөрүп берүү жана сактоо учурунда Компания, Кыргыз Республикасынын Санарип кодексинин 66-беренесинин 2-бөлүгүнүн маанисинде, башка тарап тарабынан берилген Санарип маалыматтарды өткөрүп берүү жана сактоо болуп эсептелген санарип сервисин берүүчү катары иш алып барат.

4.6

Компания телекоммуникация оператору болуп саналбайт жана жалпы пайдалануудагы телефон тармактарына кирүү мүмкүнчүлүгүн бербейт. Сервис аркылуу кадимки телефон номерлерине жана өзгөчө ыкчам кызматтарга (өрт өчүрүүчү кызматы, милиция, тез жардам, куткаруу кызматы) чалуу мүмкүн эмес. Өзгөчө кырдаал учурунда Колдонуучу өзүнүн операторунун телефон байланышын колдонушу керек.

4.7

Сервис документтерди, далилдерди же жоготулушу Колдонуучуга зыян келтириши мүмкүн болгон башка маалыматтарды сактоо үчүн арналган эмес. Колдонуучу өзү үчүн маанилүү болгон маалыматтардын көчүрмөлөрүн Сервистен тышкары өз алдынча сакташы керек.

5. ОФЕРТАНЫ КАБЫЛ АЛУУ (АКЦЕПТ). КОЛДОНУУЧУНУН АРАКЕТКЕ ЖӨНДӨМДҮҮЛҮГҮ ЖАНА ЖАШ КУРАГЫ.

5.1

Акцепт деп Колдонуучу Тиркемеде төмөнкү аракеттердин бардыгын жасашы түшүнүлөт:

  • а)Колдонуучунун Келишим жана Саясат менен таанышканын жана алардын шарттарын кабыл алганын ырастаган белгини коюшу же жанында Келишимге жана Саясатка шилтемелер, ошондой эле басуу алардын шарттарын кабыл алууну билдирери жөнүндө текст жайгаштырылган баскычты басышы;
  • б)Телефон номерин киргизиши;
  • в)алынган Ырастоо кодун киргизиши.
5.2

Келишим Ырастоо коду ийгиликтүү киргизилген учурдан тартып, башкача айтканда, Компания Акцептти алган учурдан тартып түзүлгөн болуп эсептелет (Кыргыз Республикасынын Граждандык кодексинин 394-беренесинин 1-пункту). Ошол учурдан тартып жак Колдонуучу статусуна ээ болот.

5.3

Акцепт толук жана эч кандай шартсыз болууга тийиш. Келишимди жарым-жартылай же башка шарттар менен кабыл алууга жол берилбейт. Компания Колдонуучуга берүүгө милдеттүү болгон бардык маалыматтар Акцептке чейин жеткиликтүү болот.

5.4

Эсептик жазууну каттоо жана Акцепт Кыргыз Республикасынын мыйзамдарына ылайык Келишимдин шарттарын өз алдынча кабыл алууга жана өзүнүн жеке маалыматтарын иштеп чыгууга өз алдынча макулдук берүүгө аракет жөндөмдүүлүгүнө ээ жак тарабынан жүзөгө ашырылат. Акцептти жасоо менен Колдонуучу ушул талаптарга жооп берерин ырастайт. Компания Колдонуучунун жаш курагын жана аракетке жөндөмдүүлүгүн текшербейт жана Колдонуучу өзү жөнүндө жалган же анык эмес маалыматтарды берүүсүнүн кесепеттери үчүн жоопкерчилик тартпайт.

5.5

Төмөнкү адамдар Акцепт жасоого жана Сервисти пайдаланууга укуктуу эмес:

  • а)14 (он төрт) жашка чыга элек адамдар;
  • б)сот тарабынан аракетке жөндөмсүз деп таанылган адамдар, алардын мыйзамдуу өкүлдөрүнүн катышуусусуз;
  • в)Келишимди бузгандыгы үчүн Компания тарабынан Эсептик жазуусу мурда бөгөттөлгөн адамдар, Компаниянын жазуу жүзүндөгү уруксатысыз;
  • г)Сервисти Мыйзамдарды же Эрежелерди бузуу менен пайдаланууну көздөгөн адамдар.
5.6

Акцепт жасоо менен Колдонуучу Компанияга төмөнкүлөрдү ырастайт:

  • а)ал Келишимдин 5.4-5.5-пункттарында белгиленген талаптарга жооп берет;
  • б)Телефон номери өзүнө таандык экендигин же аны мыйзамдуу негизде пайдаланып жаткандыгын;
  • в)Компанияга берген маалыматтары анык экендигин жана үчүнчү жактардын укуктарын бузбай тургандыгын;
  • г)Келишимдин шарттарын, анын ичинде Келишимдин 8, 9, 18 жана 20-бөлүмдөрүнүн жоболорун түшүнөрүн.

Компания ушул ырастоолорго таянуу менен Келишим түзөт. Эгерде кандайдыр бир ырастоо чындыкка дал келбесе, Компания Келишимдин 18-бөлүмүндө каралган чараларды колдонууга жана келтирилген чыгымдардын ордун толтурууну талап кылууга укуктуу.

5.7

Колдонуучу Сервисти ишкердик же кесиптик ишмердүүлүккө байланыштуу пайдаланууда деп төмөнкү учурларда таанылат, атап айтканда, эгерде:

  • а)ал ишкердик ишмердүүлүк үчүн арналган бизнес-аккаунтту же башка Акы төлөнүүчү функцияны кошкон болсо;
  • б)ал Каналда жарнама жайгаштырса же Каналдан башка жол менен киреше алса;
  • в)анын Эсептик жазуусу же Каналы Сервисте уюмга же жеке ишкерге таандык катары, анын ичинде расмий Канал катары белгиленген болсо.

Ушул пункттун «а»-«в» пунктчаларында көрсөтүлгөн функцияларды кошуу менен Колдонуучу аларды ишкердик же кесиптик ишмердүүлүккө байланыштуу пайдаланарын ырастайт, ал эми Компания бул жөнүндө Санарип жазууну сактайт. Мындай пайдалануу бөлүгүндө Колдонуучу керектөөчү болуп эсептелбейт жана ага керектөөчүлөрдүн укуктарын коргоо жөнүндө мыйзамдардын жоболору колдонулбайт. Келишимге ишкердик ишмердүүлүккө байланыштуу кошулган Колдонуучу Келишимди кандай шарттарда түзүп жатканын билгенин ырастайт (Кыргыз Республикасынын Граждандык кодексинин 387-беренесинин 3-пункту).

5.8

Компания Акцепттин жасалгандыгын жана датасын, Колдонуучу тарабынан кабыл алынган Келишимдин редакциясын, ошондой эле Келишимдин аткарылгандыгы фактысын тастыктаган Санарип жазууларды Келишимдин колдонулуу мөөнөтүнүн бүткүл мезгилинде жана ал токтотулгандан кийин 3 (үч) жыл бою сактайт. Келишимдин колдонуудагы редакциясынын тексти жана анын мурунку редакцияларынын архиви Сайтта аларды сактоого жана кайра чыгарууга мүмкүндүк берген формада жеткиликтүү болот. (Кыргыз Республикасынын Санарип кодексинин 114-беренесинин 4-бөлүгү).

6. КАТТОО, ЭСЕПТИК ЖАЗУУ ЖАНА ВЕРИФИКАЦИЯ

6.1

Катталуу үчүн Колдонуучу Тиркемени орнотот, интерфейстин тилин тандайт, Акцепт жасайт, Сервисте көрсөтүлүүчү атын жана өз каалоосу боюнча Аватарды көрсөтөт. Андан кийин Эсептик жазуу түзүлүп, ага уникалдуу колдонуучу аты ыйгарылат (мисалы, @name_123456).

6.2

Каттоо Кыргыз Республикасынын байланыш операторунун +996 коду менен башталган Телефон номери аркылуу гана мүмкүн. Бул чектөө Кыргыз Республикасынын Санарип кодексинин 113-беренесинин 6-бөлүгүнө ылайык Келишимде так каралган. Колдонуучунун жарандыгы мааниге ээ эмес. Компания Сайтта же Тиркемеде маалыматты жайгаштыруу менен уруксат берилген номерлердин жана өлкөлөрдүн тизмесин кеңейтүүгө укуктуу; мындай кеңейтүү Келишимге өзгөртүү киргизүү болуп эсептелбейт.

6.3

Бир Телефон номери бир гана Эсептик жазууга байланыштырылышы мүмкүн. Эгерде Тиркеменин функционалында башкача каралбаса, бир Түзмөктө бир нече Эсептик жазууну биринин Эсептик жазуусунан чыгып, экинчисине кирүү жолу менен гана кезектешип пайдаланууга болот.

6.4

Колдонуучу Телефон номеринин актуалдуулугун камсыз кылууга милдеттүү. Эгерде Колдонуучу Телефон номерин пайдаланууну токтотсо (номерден баш тартуу, SIM-картаны жоготуу, оператор менен түзүлгөн келишимдин токтотулушу), ал буга чейин Эсептик жазуудагы Телефон номерин өзгөртүүгө (эгер мындай функция бар болсо) же Эсептик жазууну өчүрүүгө милдеттүү. Байланыш оператору Телефон номерин башка жакка өткөрүп берүүсүнө байланыштуу бардык тобокелдиктерди Колдонуучу өзү тартат.

6.5

Ырастоо кодун киргизүү аркылуу Телефон номерине ээлик кылуусун ырастаган жак Келишимдин максаттары үчүн ошол номердин мыйзамдуу пайдалануучусу болуп эсептелет. Эгерде Эсептик жазууга байланыштырылган Телефон номери башка адамга өтсө, Компания ошол адамдын кайрылуусу боюнча номерди мурдагы Эсептик жазуудан ажыратууга укуктуу. Эгерде Колдонуучу Келишимдин 6.4-пунктунда каралган милдетин аткарбаса, Компания номердин жаңы ээси тарабынан Эсептик жазууга жеткиликтүүлүк алынганы үчүн жооп бербейт.

6.6

Колдонуучу Сервисте көрсөтүлүүчү атын, анын ичинде псевдонимди өз алдынча тандап алууга укуктуу. Ошону менен бирге башка адамдарды Колдонуучунун ким экендиги боюнча жаңылыш түшүнүккө алып келген, өзүн башка адам, мамлекеттик орган, Компания же анын Колдоо кызматы катары көрсөткөн, товардык белгилерге же үчүнчү жактардын башка укуктарына доо келтирген же Эрежелерди бузган аттарды, Аватарларды же колдонуучу аттарын пайдаланууга тыюу салынат.

6.7

Эгерде колдонуучу аты Келишимдин 6.6-пунктун бузса же ага карата укук ээси тарабынан негиздүү доомат келтирилсе, Компания Колдонуучунун макулдугусуз эле мындай колдонуучу атын өзгөртүүгө же бошотууга укуктуу, бул тууралуу Колдонуучуга Келишимдин 17-бөлүмүндө белгиленген тартипте билдирет.

6.8

Эсептик жазуу жеке мүнөзгө ээ. Колдонуучу Келишимдин колдонуу мөөнөтү ичинде өзүнүн инсандык таандыктыгын сактоого милдеттүү жана Эсептик жазууну үчүнчү жактарга өткөрүп берүүгө, сатууга, пайдаланууга берүүгө же башкача түрдө алардын карамагына берүүгө укуксуз.

6.9

Тараптар ушул бөлүм Сервистеги Санарип идентификациянын жана Санарип аутентификациянын эрежелерин белгилей тургандыгы жөнүндө макулдашышты. Колдонуучунун идентификатору болуп Телефон номери, ачкычы болуп Ырастоо коду, ал эми Тиркеменин функцияларында каралган учурларда ошондой эле сырсөз, сыр сөз айкашы, Түндүк аркылуу ырастоо же авторизациянын башка фактору эсептелет. Ийгиликтүү авторизациядан кийин Эсептик жазуу аркылуу Сервисте жасалган бардык аракеттер Колдонуучунун өзү тарабынан жасалган деп эсептелет, ал эми бул аракеттер жөнүндө Санарип жазуулар, Колдонуучу тескерисин далилдемейинче, алардын жасалгандыгынын далили катары Тараптар тарабынан таанылат.

6.10

Колдонуучу Ырастоо коддорун, сырсөздөрдү жана сыр сөз айкаштарын эч кимге билдирбөөгө, Түзмөктү коргоосуз калтырбоого жана Эсептик жазууга уруксатсыз жеткиликтүүлүк байкалса же Түзмөктүн жоголушу жөнүндө дароо Колдоо кызматына билдирүүгө милдеттүү. Компаниянын кызматкерлери эч качан Ырастоо коддорун же сыр сөз айкаштарын сурашпайт. Эгерде үчүнчү жактардын Эсептик жазууга жеткиликтүүлүгү ушул пункттун Колдонуучу тарабынан бузулушунун натыйжасында мүмкүн болсо, Компания анын кесепеттери үчүн жооп бербейт.

6.11

Верификация ыктыярдуу болуп саналат жана Колдонуучунун демилгеси боюнча гана жүргүзүлөт.

6.12

Верификация жүргүзүлгөндө жана Түндүк аркылуу киргенде Компания Түндүктөн Саясатта көрсөтүлгөн маалыматтарды гана жана Колдонуучу алардын берилүүсүн Түндүктүн интерфейсинде ырастагандан кийин гана алат. Компания Түндүктөгү Колдонуучунун сырсөздөрүн жана башка аутентификация каражаттарын албайт. Алынган маалыматтарды (мисалы, фамилиясын жана атын) башка Колдонуучуларга көрсөтүү тартибин, эгер мындай функция каралган болсо, Колдонуучу Тиркеменин жөндөөлөрүндө өзү аныктайт. Компания Түндүктүн иштеши, жеткиликтүүлүгү жана ал өткөрүп берген маалыматтардын аныктыгы үчүн жооп бербейт.

6.13

Верификация белгиси анын жүргүзүлгөн күнүнө карата процедуранын ийгиликтүү өткөндүгүн гана тастыктайт. Ал Верификациядан өткөн Колдонуучунун ак ниеттүүлүгүнө же жүрүм-турумуна карата Компаниянын сунушу, кепилдемеси же кепилдиги болуп эсептелбейт.

6.14

Эгерде уруксатсыз жеткиликтүүлүктүн белгилери, Эсептик жазуунун башка адамга өткөрүлүп берилгендигинин белгилери болсо же бул Мыйзамдарда талап кылынса, Компания Телефон номерин кайра ырастоону же кайра Верификациядан өтүүнү талап кылууга жана алар бүткөнгө чейин Эсептик жазууга жеткиликтүүлүктү чектөөгө укуктуу.

6.15

Колдонуучунун профили (аты, колдонуучу аты, Аватары) колдонуучу атын, профилге шилтемени же профилдин QR-кодун билген ар бир адам үчүн жеткиликтүү. Колдонуучу профилге кандай маалыматтарды жайгаштырууну жана шилтемени же QR-кодду кимге берүүнү өз алдынча чечет. Эгерде бул Тиркеменин функцияларында каралган болсо, Колдонуучу жөндөөлөрдө өзүнүн профилиндеги маалыматтарды көрө ала турган адамдардын чөйрөсүн чектөөгө, анын ичинде аларды байланыштар тизмесине кирбеген адамдардан жашырууга укуктуу. Колдонуучу жөндөөлөрдө анын көрсөтүлүшүнө өзү уруксат бермейинче, Телефон номери башка Колдонуучуларга көрсөтүлбөйт.

6.16

Эгерде бул Тиркеменин функцияларында каралган болсо, Колдонуучу өз тандоосу боюнча Эсептик жазууга Телефон номери аркылуу же Түндүк аркылуу кирүүгө укуктуу. Түндүк аркылуу кирген учурда Колдонуучунун идентификациясын жана аутентификациясын Түндүк жүргүзөт, ал эми Компания алардын натыйжасы жөнүндө ырастоону гана алат. Телефон номери аркылуу кирген Колдонуучуга Тиркеме өздүгүн Түндүк аркылуу ырастоону (Верификацияны), анын ичинде Сервистин айрым функцияларын пайдаланууда сунушташы мүмкүн. Түндүк аркылуу кирүү жана Верификация ыктыярдуу болуп саналат. Андан баш тартуу Сервистин негизги функцияларына жеткиликтүүлүктү чектебейт, Верификациядан өткөн Колдонуучулар үчүн гана жеткиликтүү болгон функциялардан тышкары. Түндүк аркылуу киргенден кийин Сервисте жасалган аракеттер Келишимдин 6.9-пунктуна ылайык Колдонуучу тарабынан жасалган деп эсептелет.

6.17

Колдонуучу өзүнүн Түндүккө кирүү каражаттарын үчүнчү жактардын пайдалануусуна жол бербөөгө милдеттүү. Эгерде мындай кирүү Компания тарабынан Келишимдин бузулушунун натыйжасында мүмкүн болбосо, Компания Түндүктөгү Колдонуучунун аутентификация каражаттарына жеткиликтүүлүк алган адамдын Эсептик жазууга кирүүсүнүн кесепеттери үчүн жооп бербейт.

7. СЕРВИСТИН ФУНКЦИЯЛАРЫ. СЕРВИСТИ ӨЗГӨРТҮҮ

7.1

Сервис Колдонуучуларга Билдирүүлөр менен алмашууга, Чалууларды жүргүзүүгө, Топторго жана Каналдарга катышууга, ошондой эле Тиркеменин колдонуудагы версиясында жеткиликтүү болгон башка функцияларды пайдаланууга мүмкүндүк берет. Сервистин функцияларынын тизмеси жана аларды пайдалануу тартиби Колдонуучуларга Тиркеме жана Сайт аркылуу маалымдалат.

7.2

Келишимдин 7.1-пунктунда келтирилген тизме маалымдоочу мүнөзгө ээ. Функциялардын иш жүзүндөгү көлөмү Тиркеменин колдонуудагы версиясы менен аныкталат. Сайттагы, тиркемелер дүкөндөрүндөгү, социалдык тармактардагы, презентациялардагы жана жарнамалык материалдардагы Сервис жөнүндө баяндоолор, анын ичинде шифрлөө жана маалыматтарды коргоо өзгөчөлүктөрү тууралуу маалыматтар маалыматтык мүнөздө болуп саналат, Келишимдин шарттары болуп эсептелбейт жана Компания үчүн милдеттенмелерди жаратпайт. Шифрлөөнүн өзгөчөлүктөрү, ошондой эле Билдирүүлөрдүн мазмунуна жетүү учурлары жана чектери Келишимдин 8-бөлүмү менен гана аныкталат.

7.3

Сервисти пайдаланууга карата колдонулуп жаткан чектөөлөр, анын ичинде берилүүчү файлдардын түрүнө, форматына жана көлөмүнө, Топтун катышуучуларынын санына, Билдирүүлөрдү жөнөтүүнүн санына жана жыштыгына карата чектөөлөр Тиркемеде жана (же) Сайтта жайгаштырылат, ошондой эле Тиркеменин техникалык каражаттары аркылуу белгиленет. Мындай чектөөлөрдү өзгөртүү Келишимдин 7.4-пунктунда белгиленген тартипте жүргүзүлөт.

7.4

Компания Сервистен пайдалануунун шарттарын өз алдынча аныктайт (Кыргыз Республикасынын Санарип кодексинин 33-беренесинин 1-бөлүгү). Компания каалаган убакта Сервистин функцияларын кошууга, өзгөртүүгө, убактылуу токтото турууга же токтотууга, анын интерфейсин, дизайнын, техникалык мүнөздөмөлөрүн жана лимиттерин өзгөртүүгө укуктуу. Эгерде мындай аракеттер Колдонуучунун Келишимде жана Мыйзамдарда белгиленген укуктарын чектебесе, алар Келишимге өзгөртүү киргизүү болуп эсептелбейт жана Келишимдин 23-бөлүмүндө каралган тартипти сактоону талап кылбайт. Компания олуттуу функциянын токтотулушу жөнүндө мүмкүн болушунча алдын ала Тиркеме же Сайт аркылуу маалымдайт.

7.5

Компания Тиркеменин жаңыртууларын чыгарып турат. Колдонуучу аларды өз убагында орнотууга милдеттүү. Компания Тиркеменин эскирген версияларын колдоону токтотууга укуктуу. Мындай учурда жаңыртууну орнотпостон Сервисти пайдалануу мүмкүн болбой калышы мүмкүн.

7.6

Тиркеменин иштеши үчүн Түзмөк тиркемелер дүкөнүндө же Сайтта көрсөтүлгөн минималдуу техникалык талаптарга жооп берүүгө тийиш.

7.7

Сервистин иштеши үчүн үчүнчү жактардын сервистери пайдаланылат: операциялык системалар жана тиркемелер дүкөндөрү, push-билдирүү сервистери, идентификациялоо системалары жана байланыш операторлору. Компания алардын ишин көзөмөлдөбөйт жана мындай үчүнчү жак Компаниянын Иштеп чыгуучусу катары аракеттенген учурларды кошпогондо, алардын ишиндеги үзгүлтүктөр үчүн жооп бербейт.

8. ШИФРЛӨӨ, БИЛДИРҮҮЛӨРДҮ САКТОО ЖАНА АЛАРДЫН МАЗМУНУНА ЖЕТКИЛИКТҮҮЛҮК

8.1

Компания бардык түрдөгү чаттарда криптографиялык протоколдорду колдонуу менен Билдирүүлөрдү жана Чалууларды шифрлейт. Билдирүүлөрдүн мазмуну, сүрөттөр жана үн билдирүүлөрү Компаниянын серверлеринде шифрленген түрдө сакталат.

8.2

Сервисте Жеткиликтүүлүктү калыбына келтирүү механизми колдонулат. Бул Компания техникалык жактан шифрленген Билдирүүлөрдүн мазмунуна жеткиликтүүлүктү калыбына келтире аларын билдирет. Компания Билдирүүлөрдүн мазмуну бардык жагдайларда өзү үчүн жеткиликсиз деп ырастабайт. Компания Жеткиликтүүлүктү калыбына келтирүү механизмин Келишимдин 8.4-пунктунда көрсөтүлгөн учурларда гана колдонот.

8.3

Келишимдин 8.4-пунктунда көрсөтүлгөн учурлардан тышкары, Билдирүүнүн мазмуну төмөнкү жактар үчүн жеткиликтүү болуп калышы мүмкүн:

  • а)анын алуучулары үчүн, анын ичинде Топтун бардык катышуучулары үчүн, ошондой эле алуучулар Билдирүүнү жөнөткөн же башка жол менен көрсөткөн бардык адамдар үчүн;
  • б)Жасалма интеллект функцияларын камсыздоочуга, эгерде бул Билдирүүгө Келишимдин 9-бөлүмүндө белгиленген тартипте ЖИ функциялары колдонулса;
  • в)Компания үчүн, эгерде Колдонуучу өзү Билдирүүнү Колдоо кызматына жөнөтсө, мисалы, даттануу менен кошо;
  • г)жөнөтүүчүнүн же алуучунун кулпусу ачылган Түзмөгүнө жеткиликтүүлүк алган ар кандай адам үчүн.
8.4

Компания Жеткиликтүүлүктү калыбына келтирүү механизмин төмөнкү учурларда гана колдонууга укуктуу:

  • а)Тиркемеде мындай функция каралган болсо, Колдонуучунун өзүнүн инсандыгы ырасталгандан кийин анын өз Билдирүүлөрүнө жеткиликтүүлүгүн калыбына келтирүү үчүн Колдонуучунун өтүнүчү боюнча (мисалы, Түзмөк алмашкан учурда);
  • б)мыйзамда каралган учурларда жана соттук актыда көрсөтүлгөн мөөнөткө карата белгилүү бир Колдонуучуга байланыштуу чыгарылган соттук актыны аткаруу үчүн;
  • в)мыйзамда түздөн-түз каралган башка учурларда, мыйзамда белгиленген тартипти сактоо менен.

Компания Жеткиликтүүлүктү калыбына келтирүү механизмин жана Билдирүүлөрдүн мазмунун жарнама үчүн, аналитика жүргүзүү үчүн, Колдонуучулардын профилдерин түзүү үчүн же жасалма интеллект системаларын окутуу үчүн пайдаланбайт.

8.5

Жеткиликтүүлүктү калыбына келтирүү механизминин колдонулушуна Компаниянын буйругу менен дайындалган жана купуялуулукту сактоо жөнүндө милдеттенме алган кызматкерлердин чектелген чөйрөсү гана жеткиликтүү болот. Ар бир колдонуу негизин, датасын, жооптуу адамды жана алынган маалыматтардын көлөмүн көрсөтүү менен журналда катталат.

8.6

Компания Сервистин жардамы менен берилген кат алышуулардын, телефондук жана башка сүйлөшүүлөрдүн, ошондой эле билдирүүлөрдүн купуялуулугун камсыз кылат.

8.7

Компания Ыйгарым укуктуу органдарга Колдонуучулар жөнүндө маалыматтарды, Метадайындарды жана Билдирүүлөрдүн мазмунун мыйзамдарда белгиленген негиздер боюнча жана тартипте гана берет. Сурамды аткаруудан мурда Компания сурам жөнөткөн органдын ыйгарым укуктарын жана мыйзамдуу негиздердин бар экендигин текшерет жана мыйзамдарга ылайык келбеген сурамды аткаруудан баш тартууга укуктуу.

8.8

Сервистин маалыматтары Кыргыз Республикасынын аймагында жайгашкан серверлерде сакталат.

8.9

Билдирүүлөрдүн шифрленген мазмуну Колдонуучу аларды өчүргөнгө чейин же Келишимдин 24-бөлүмүндө белгиленген тартипте Эсептик жазуу өчүрүлгөнгө чейин сакталат. Метадайындарды жана башка маалыматтарды сактоо мөөнөттөрү Саясатта белгиленет.

8.10

Колдонуучу өзү жөнөткөн Билдирүүнү өчүрүүгө укуктуу. Өчүрүү чаттын бардык катышуучуларында жүргүзүлөт, акыркы болуп эсептелет жана жокко чыгарылбайт. Компания өчүрүлгөн Билдирүүлөрдү калыбына келтирбейт. Колдонуучу өчүрүлгөнгө чейин алуучулар Билдирүүнү окуп, көчүрүп, сүрөткө тартып же башка жактарга жөнөтүп коюшу мүмкүн экенин эске алууга тийиш.

8.11

Колдонуучу өзү жөнөткөн Билдирүүнү түзөтүүгө укуктуу. Түзөтүлгөн Билдирүү «Өзгөртүлдү» деген белги менен белгиленет. Билдирүүнүн мурдагы редакциясы башка Колдонуучуларга көрсөтүлбөйт.

8.12

Билдирүүлөрдүн тарыхына жеткиликтүүлүк Колдонуучунун Түзмөгүндөгү криптографиялык ачкычтар менен байланыштуу. Тиркемени өчүрүп кайра орноткондо, Түзмөк алмашканда, жоголгондо же анын жөндөөлөрү баштапкы абалга келтирилгенде мурда алынган Билдирүүлөрдү окуу мүмкүн болбой калышы мүмкүн. Тараптар мындай жеткиликсиздик ушул пунктта көрсөтүлгөн жагдайлардан же Колдонуучунун резервдик көчүрүү функциясын пайдаланбаганынан улам келип чыккан учурда сапатсыз Санарип кызмат көрсөтүү болуп эсептелбейт деп макулдашышат.

8.13

Резервдик көчүрүү жана бир нече Түзмөктө иштөө функциясы (эгерде бар болсо) Колдонуучу тарабынан белгиленген сырсөз фразасы менен корголот. Анын сакталышы жана жашыруундуулугу үчүн Колдонуучу өзү жооп берет. Сырсөз фразасы жоголгон учурда жеткиликтүүлүктү калыбына келтирүү Келишимдин 8.4-пунктунун «а» подпунктунда белгиленген тартипте гана мүмкүн, эгерде мындай мүмкүнчүлүк Тиркеменин функцияларында каралган болсо; башка учурларда Билдирүүлөрдүн тарыхы биротоло жоголушу мүмкүн. Эсептик жазууга кирген учурда Тиркеме милдеттүү түрдө Колдонуучунун Билдирүүлөрүнө жетүү ачкычтарынын резервдик көчүрмөсүн түзөт. Резервдик көчүрмөнү андан ары пайдаланууну, ошондой эле ага жетүү каражаттарынын сакталышын Колдонуучу өз алдынча камсыз кылат жана алардын жоголуу тобокелдигин өзү тартат.

8.14

Компания маалыматтарды коргоо боюнча акылга сыярлык уюштуруучулук жана техникалык чараларды көрөт, бирок маалыматтардын абсолюттук корголушуна кепилдик бербейт. Түзмөктү зыяндуу программалардан жана үчүнчү жактардын жеткиликтүүлүгүнөн коргоону Колдонуучу өзү камсыз кылат.

8.15

Эгерде Тиркеменин функцияларында каралган болсо, Колдонуучу чатта белгилүү бир убакыт өткөндөн кийин Билдирүүлөр Жоголуучу билдирүүлөргө айланып автоматтык түрдө өчүрүлө турган таймерди орното алат. Өчүрүү чаттын катышуучуларынын Түзмөктөрүндө (алар Сервиске туташкан учурда) жана Компаниянын серверлеринде жүргүзүлөт. Билдирүүнүн өчүрүлүшү өзүнчө сакталуучу жана өчүрүлгөн билдирүүнүн мазмунун калыбына келтирүүгө мүмкүндүк бербеген жетүү ачкычтарынын өчүрүлүшүнө алып келбейт. Бул функция алуучулардын билдирүүнүн мазмунун өчүрүлгөнгө чейин сактап калуусуна, анын ичинде экран сүрөтүн тартууга, көчүрүүгө, башка жакка жөнөтүүгө же сүрөткө тартууга тоскоолдук кылбайт жана Тиркемеден тышкары түзүлгөн көчүрмөлөргө жайылтылбайт. Жоголуучу билдирүүлөр өчүрүлгөндөн кийин калыбына келтирилбейт, ал эми алардын жоголушу Сервистин кемчилиги болуп эсептелбейт. Таймер Саясатта белгиленген Метадайындарды сактоо мөөнөтүнө таасир этпейт.

8.16

Тиркеменин биометрикалык кулпулоосу (Face ID, Touch ID жана ушул сыяктуу функциялар) Түзмөктүн операциялык системасы тарабынан жүзөгө ашырылат. Тиркеме операциялык системадан текшерүүнүн жыйынтыгын гана алат (ийгиликтүү же ийгиликсиз). Компания Колдонуучунун биометрикалык маалыматтарын албайт, сактабайт жана иштетпейт. Биометрикалык кулпулоо Келишимдин 6.10-пунктунда каралган Түзмөктүн коргоо чараларын алмаштырбайт.

9. ЖАСАЛМА ИНТЕЛЛЕКТТИН ФУНКЦИЯЛАРЫ

9.1

Жасалма интеллекттин (ЖИ) функциялары үн билдирүүнү текстке айландырууга жана Билдирүүнү кыргыз тилинен орус тилине жана тескерисинче которууга мүмкүндүк берет. ЖИ функциялары Тиркеменин жөндөөлөрүндө каралган болсо, Колдонуучунун буйругу боюнча колдонулат.

9.2

ЖИ функцияларынын иштеши үчүн тиешелүү Билдирүүнүн мазмуну (үн жазуусу же текст) иштеп чыгууга ылайыктуу түрдө корголгон байланыш каналы аркылуу ЖИ функцияларынын Провайдерине өткөрүлүп берилет. Иштеп чыгуунун натыйжасы Сервиске кайтарылат. ЖИ функцияларынын Провайдери тарабынан маалыматтарды сактоо шарттары 4-тиркемеде көрсөтүлгөн.

9.3

Билдирүүнү жөнөтүү менен Колдонуучу анын алуучусу Келишимдин 9.2-пунктунда белгиленген тартипте ага карата ЖИ функцияларын колдонууга укуктуу экендигине макул болот.

9.4

ЖИ функцияларынын натыйжалары адам тарабынан текшерилбестен автоматтык түрдө түзүлөт жана өзгөчө тышкы ызы-чуу, диалекттер, тилдердин аралашуусу, ысымдар жана атайын терминдер колдонулган учурларда каталарды жана так эместиктерди камтышы мүмкүн. Натыйжа кесиптик же расмий котормо болуп эсептелбейт жана баштапкы Билдирүүнү алмаштырбайт. Анын негизинде маанилүү чечимдерди (укуктук, финансылык, медициналык жана башка) кабыл алуудан мурда Колдонуучу аны өз алдынча баштапкы Билдирүү менен салыштырып текшерүүгө милдеттүү.

9.5

ЖИ функцияларынын натыйжалары Тиркеменин интерфейсинде жасалма интеллект колдонулуп алынгандыгы жөнүндө белги менен көрсөтүлөт. Жасалма интеллект системаларын колдонуу жөнүндө маалыматтар жана алардын коркунуч деңгээлин баалоонун жыйынтыктары Сайтта жарыяланат жана 4-тиркемеде келтирилет (Кыргыз Республикасынын Санарип кодексинин 197-беренесинин 1-бөлүгү).

9.6

ЖИ функциялары Колдонуучуга карата укуктук кесепеттерди жараткан автоматташтырылган чечимдерди кабыл алуу үчүн колдонулбайт. Эгерде Компания мындай чечимдерди (мисалы, спамдан автоматтык коргоону) киргизсе, бул жөнүндө алдын ала Саясатта маалымдайт.

9.7

Компания каалаган убакта ЖИ функцияларын өзгөртүүгө, чектөөгө (анын ичинде сурамдардын саны боюнча) же өчүрүүгө, ошондой эле ЖИ функцияларынын Провайдерин алмаштырууга укуктуу, мында Провайдердин алмаштырылганы жөнүндө маалымат 4-тиркемеде көрсөтүлөт.

9.8

Колдонуучуга ден соолук жөнүндө маалыматтарды, банктык реквизиттерди, сырсөздөрдү же башка сезимтал маалыматтарды камтыган Билдирүүлөргө карата ЖИ функцияларын колдонбоо сунушталат.

10. ТОПТОР ЖАНА КАНАЛДАР

10.1

Ар бир Колдонуучу Топ түзүүгө укуктуу. Эгерде Тиркеменин функцияларында башка тартип каралбаса, Топко Топтун Түзүүчүсүнүн чакыруусу боюнча гана кошулууга болот.

10.2

Топтун Түзүүчүсү катышуучуларды кошууга жана чыгарууга укуктуу, ошондой эле Топ түзүлгөндө анын аталышын жана сүрөтүн белгилейт. Башка ролдор жана ыйгарым укуктар (администраторлор, модераторлор) Компания тарабынан Келишимдин 7.4-пунктунда белгиленген тартипте киргизилиши мүмкүн; алардын ыйгарым укуктарынын чегинде ушул бөлүмдүн Топтун Түзүүчүсүнө карата эрежелери колдонулат.

10.3

Топтун Түзүүчүсү өз атынан жана өз кызыкчылыктарында аракеттенет. Ал Компаниянын өкүлү, кызматкери же Иштеп чыгуучусу болуп эсептелбейт. Топтун Түзүүчүсү Топтун аталышы, сүрөтү, максаты жана катышуучуларынын курамы үчүн жооп берет жана Топтун Мыйзамдарды жана Эрежелерди бузуу менен пайдаланылышына жол бербөөгө милдеттүү.

10.4

Топтун Түзүүчүсү Топко катышууга макул болгон адамдарды гана кошот. Ар бир катышуучу каалаган убакта Топтон чыгууга укуктуу. Катышуучу чыкканга чейин жөнөткөн Билдирүүлөр, эгерде аларды Келишимдин 8.10-пунктунда белгиленген тартипте өчүрбөсө, башка катышуучулар үчүн жеткиликтүү бойдон калат.

10.5

Топко кошулуу менен Колдонуучу өзүнүн аты-жөнү, колдонуучу аты, Аватары жана Топко жөнөткөн Билдирүүлөрү анын бардык катышуучуларына, анын ичинде кийинчерээк кошулган катышуучуларга да жеткиликтүү болушу мүмкүн экенине макул болот, эгерде Тиркеменин функцияларында билдирүүлөр тарыхына жеткиликтүүлүк каралган болсо.

10.6

Компания Топторду модерациялабайт жана өз демилгеси менен алардын мазмунун текшербейт. Компания 3-тиркемеде белгиленген тартипте берилген даттануулар боюнча, Ыйгарым укуктуу органдардын талаптары боюнча жана Келишимдин 18-бөлүмүндө каралган учурларда гана аракеттенет.

10.7

Топтун катышуучуларынын ортосундагы талаштар, анын ичинде Топтон чыгарууга байланышкан талаштар, катышуучулар тарабынан өз алдынча чечилет. Эгерде талаш Эрежелердин же Мыйзамдардын бузулушуна байланыштуу болсо, ар бир катышуучу 3-тиркемеде белгиленген тартипте каралуучу даттануу жөнөтүүгө укуктуу.

10.8

Эгерде Топтун Түзүүчүсүнүн Эсептик жазуусу өчүрүлсө же бөгөттөлсө, Топ Тиркеменин функцияларында каралган тартипте ишин улантат. Компания Топтун Түзүүчүсүнүн ыйгарым укуктарын катышуучулардын бирине өткөрүп берүүгө же курамында катышуучулар калбаган же календардык 12 айдын ичинде эч кандай активдүүлүк болбогон Топту өчүрүүгө укуктуу.

10.9

Катышуучуларынын чөйрөсү чектелген Топтун мазмуну кат алышуу сыры болуп эсептелет. Каналда жайгаштырылган маалымат адамдардын чектелбеген чөйрөсүнө багытталган жана кат алышуу сырына кирбейт. Ачык Топторду пайдалануунун шарттары, эгерде алар Сервисте пайда болсо, Келишимдин 23-бөлүмүндө белгиленген тартипте аныкталат.

10.10

Эгерде Тиркеменин функцияларында каралган болсо, Каналды Колдонуучу түзө алат. Каналдын Ээси Каналдын тематикасын жана анда жайгаштырылуучу маалыматты өз алдынча аныктайт, өз атынан жана өз кызыкчылыктарында аракеттенет жана Компаниянын өкүлү, кызматкери же Иштеп чыгуучусу болуп эсептелбейт.

10.11

Каналдын Ээси Каналда жайгаштырылган маалымат үчүн Мыйзамдарга, анын ичинде жарнама, жалпыга маалымдоо каражаттары жана интеллектуалдык менчик жөнүндө мыйзамдарга ылайык жоопкерчилик тартат. Компания Каналдын редактору же басып чыгаруучусу болуп эсептелбейт, анын мазмунун тандабайт жана өзгөртпөйт жана Келишимдин 4-бөлүмүндө белгиленген чектерде ал үчүн жооп бербейт. Эгерде Канал Мыйзамдарга ылайык жалпыга маалымдоо каражаты катары таанылышы мүмкүн болсо, мындай мыйзамдардын талаптарын Каналдын Ээси аткарат.

10.12

Каналдагы жарнама Каналдын Ээси тарабынан тиешелүү колдонулуучу мыйзамдардын талаптарын сактоо менен гана жайгаштырылат. Үчүнчү жактардын жарнамасын жайгаштыруу менен Каналдын Ээси жарнама таратуучу катары аракеттенет. Компания Каналдарда жарнаманы жайгаштырууга карата кошумча эрежелерди белгилөөгө, анын көлөмүн чектөөгө жана Келишимдин 16-бөлүмүнө ылайык Каналдарды акы төлөнүүчү илгерилетүүнү караштырууга укуктуу.

10.13

Каналга жазылуу ыктыярдуу болуп саналат. Жазылуучу каалаган убакта жазылуудан баш тартууга укуктуу. Жазылуучулардын тизмеси башка Жазылуучуларга көрсөтүлбөйт. Каналдын Ээси Жазылуучулардын санын жана Тиркеменин функцияларында каралган көлөмдөгү башка жекелештирилбеген статистикалык маалыматтарды көрө алат.

10.14

Каналдардагы Билдирүүлөр адамдардын чектелбеген чөйрөсүнө арналган жана жеке чаттардагыдай деңгээлде учтан-учка шифрлөө менен корголбошу мүмкүн.

10.15

Компания Каналдарды алдын ала текшерүүнү жүргүзбөйт. 3-тиркемеде белгиленген тартипте берилген даттануулар боюнча, Ыйгарым укуктуу органдардын талаптары боюнча жана Келишимдин 18-бөлүмүндө каралган учурларда Компания Каналга же өзүнчө жарыяланымга жеткиликтүүлүктү чектөөгө, Каналды өчүрүүгө, анын аталышын жана атын өзгөртүүгө же бошотууга, эгерде алар Келишимдин 6.6-пунктун же үчүнчү жактардын укуктарын бузса, ошондой эле мыйзамдуу күчүнө кирген соттун чечиминин негизинде Каналдын Ээсинин ыйгарым укуктарын белгилөөнүн укук ээсине өткөрүп берүүгө укуктуу. Компания уюмдардын жана мамлекеттик органдардын расмий Каналдарын алардын статусу текшерилгенден кийин атайын белги менен белгилөөгө укуктуу.

10.16

Эрежелердин 7-бөлүмүндө Каналдарды жүргүзүүнүн эрежелери белгиленет.

11. КОЛДОНУУЧУНУН УКУКТАРЫ ЖАНА МИЛДЕТТЕРИ

11.1

Колдонуучу төмөнкүлөргө укуктуу:

  • а)Сервисти Келишимге ылайык пайдаланууга;
  • б)Келишимдин 2-бөлүмүндө көрсөтүлгөн Компания жана Сервис жөнүндө маалыматтарды алууга;
  • в)өзүнүн маалыматтарынын иштеп чыгуу жөнүндө маалымат алууга, аларга жетүүгө, алардын көчүрмөсүн алууга, ошондой эле Саясатта каралган тартипте аларды оңдоону, өткөрүп берүүнү жана өчүрүүнү талап кылууга;
  • г)3-тиркемеде белгиленген тартипте кайрылууларды жана даттанууларды жөнөтүүгө;
  • д)Келишимдин 24-бөлүмүндө белгиленген тартипте каалаган убакта Сервистен баш тартууга жана Эсептик жазууну өчүрүүгө;
  • е)3-тиркемеде белгиленген тартипте техникалык колдоо алууга;
  • ж)Келишимде жана Мыйзамдарда каралган башка укуктарды жүзөгө ашырууга.
11.2

Колдонуучу төмөнкүлөргө милдеттүү:

  • а)Мыйзамдарды, Келишимди жана Эрежелерди сактоого;
  • б)Компанияга анык маалыматтарды берүүгө жана алардын актуалдуулугун камсыз кылууга;
  • в)Келишимдин 6.10-пунктуна ылайык Түзмөктүн жана Эсептик жазуунун коопсуздугун камсыз кылууга;
  • г)башка жактардын интеллектуалдык менчик укуктарын сактоого;
  • д)Сервисти пайдалануу менен сүрөттөрүн, каттарын же жеке маалыматтарын тараткан адамдардын макулдугун Мыйзамдар талап кылган учурларда алууга;
  • е)Тиркемени Келишимдин 14.4-пунктунда көрсөтүлгөн расмий булактардан гана орнотууга жана жаңыртууларды өз убагында орнотууга;
  • ж)Келишимди аткарууга байланыштуу Компаниянын мыйзамдуу талаптарын аткарууга, анын ичинде өзүнүн аракеттери боюнча түшкөн даттанууларга түшүндүрмө берүүгө;
  • з)Келишимдин 20-бөлүмүндө каралган учурларда жана тартипте Компанияга келтирилген чыгымдардын ордун толтурууга.
11.3

Колдонуучу Кыргыз Республикасынын Санарип кодексинин 132-беренесинин 2-бөлүгүндө көрсөтүлгөн максаттар үчүн Сервисти Компаниянын түздөн-түз макулдугу менен гана пайдаланууга укуктуу.

11.4

Акцепт жасоо менен Колдонуучу Компаниянын түздөн-түз макулдугун алат жана Тиркеменин орнотулган функцияларын гана пайдалануу, ошондой эле Келишимди, Эрежелерди жана Мыйзамдарды сактоо шартында Сервисти төмөнкү максаттарда пайдаланууга укуктуу:

  • а)Топтун катышуучуларынын же Каналдын Жазылуучуларынын арасында добуш берүүлөрдү жана сурамжылоолорду өткөрүүгө;
  • б)Топто же Каналда лотерея же кумар оюну болуп саналбаган сынактарды жана викториналарды өткөрүүгө;
  • в)Келишимдин 10.12-пунктунда белгиленген тартипте Каналда жарнама таратууга.

Ушул пункт боюнча Компаниянын макулдугун ырастоочу Санарип жазуу болуп Компанияда сакталган Акцепт жөнүндө жазуу эсептелет.

11.5

Компаниянын Санарип жазуу менен ырасталган өзүнчө түздөн-түз макулдугусуз Колдонуучуга төмөнкүлөргө тыюу салынат:

  • а)өзүнүн байланыштар тизмесине кирбеген Колдонуучулардын жеке чаттарына Билдирүүлөрдү, анын ичинде жарнамалык билдирүүлөрдү массалык түрдө жөнөтүүгө;
  • б)лотереяларды өткөрүүгө;
  • в)Сервис менен башка сервистердин ортосунда шлюздарды орнотууга, Тиркемеде каралбаган ботторду жана автоматташтырылган каражаттарды туташтырууга;
  • г)Сервисти изилдөөгө, анын ичинде анын коргоо механизмдерин тестирлөөгө.

Компания Келишим, Эрежелер же Мыйзамдар бузулган учурда белгилүү бир Колдонуучуга, Топко же Каналга карата берилген макулдукту каалаган убакта чектөөгө же кайтарып алууга укуктуу.

12. КОМПАНИЯНЫН УКУКТАРЫ ЖАНА МИЛДЕТТЕРИ

12.1

Компания төмөнкүлөргө милдеттүү:

  • а)Колдонуучуга Келишимдин шарттарына ылайык Сервистен пайдалануу мүмкүнчүлүгүн берүүгө;
  • б)Келишимдин 2-бөлүмүндө көрсөтүлгөн маалыматтарды жайгаштырууга жана аларды актуалдуу абалда кармап турууга;
  • в)мыйзамдарда белгиленген учурларды кошпогондо, Колдонуучунун маалыматтарын Келишимде жана Саясатта каралган максаттар үчүн гана иштетүүгө;
  • г)Колдоо кызматына келип түшкөн кайрылууларды иш жүгүнө жараша кабыл алууга жана аларды 3-тиркемеде белгиленген мөөнөттөрдө кароого;
  • д)Колдонуучуларга Техникалык иштер жана Инциденттер жөнүндө Келишимдин 19-бөлүмүндө белгиленген тартипте билдирүүгө;
  • е)Сервистин Санарип туруктуулугун камсыз кылуу жана маалыматтарды коргоо боюнча чараларды көрүүгө;
  • ж)Колдонуучунун Сервистен баш тартуусуна байланыштуу милдеттерди Келишимдин 24-бөлүмүндө белгиленген тартипте аткарууга.
12.2

Компания төмөнкүлөргө укуктуу:

  • а)Сервисти Келишимдин 7.4-пунктунда белгиленген тартипте, ал эми Келишимди Келишимдин 23-бөлүмүндө белгиленген тартипте өзгөртүүгө;
  • б)Сервиске жеткиликтүүлүктү чектөөгө жана Келишимдин 18-бөлүмүндө каралган башка чараларды колдонууга;
  • в)Келишимди аткаруу жана даттанууларды кароо үчүн зарыл болгон маалыматтарды жана документтерди Колдонуучудан талап кылууга;
  • г)Колдонуучуга Келишимдин 17-бөлүмүндө белгиленген тартипте сервистик билдирүүлөрдү жөнөтүүгө;
  • д)Келишимдин 2.3-пунктунда белгиленген тартипте үчүнчү жактарды тартууга;
  • е)Колдонуучуну аныктоого мүмкүндүк бербеген, Сервисти пайдалануу жөнүндө жекелештирилбеген жана жалпыланган маалыматтарды статистика жүргүзүү, изилдөөлөрдү өткөрүү жана Сервисти өнүктүрүү максатында пайдаланууга;
  • ж)Келишим боюнча өзүнүн укуктарын жана милдеттерин Келишимдин 26.4-пунктунда белгиленген тартипте өткөрүп берүүгө;
  • з)Келишимде жана Мыйзамдарда каралган башка укуктарды жүзөгө ашырууга.
12.3

Компания төмөнкүлөргө милдеттүү эмес:

  • а)Колдонуучунун Контентин жөнөтүлгөнгө чейин же жөнөтүлгөндөн кийин текшерүүгө;
  • б)Колдонуучулар тарабынан өчүрүлгөн Билдирүүлөрдү жана Келишимдин 8.12 жана 8.13-пункттарында көрсөтүлгөн жагдайлардын натыйжасында жоголгон маалыматтарды калыбына келтирүүгө;
  • в)3-тиркемеде каралган тартиптен тышкары Колдонуучулардын ортосундагы талаштарга катышууга;
  • г)Кыргыз Республикасынын мамлекеттик жана расмий тилдеринен башка тилдерде колдоо көрсөтүүгө;
  • д)Келишимде же Мыйзамдарда каралбаган функцияларды Сервисте сактап калууга.

13. КОЛДОНУУЧУНУН КОНТЕНТИ

13.1

Колдонуучунун Контентине болгон укуктар Колдонуучуга же башка укук ээлерине таандык. Компания Колдонуучунун Контентине карата Келишимдин 13.2 жана 13.3-пункттарында берилген пайдалануу укугунан тышкары эч кандай укуктарга ээ болбойт.

13.2

Акцепт жасоо менен Колдонуучу Компанияга Колдонуучунун Контентин төмөнкү ыкмалар менен пайдаланууга акысыз негизде өзгөчө эмес укук берет: сактоо, техникалык көчүрмөлөө (серверлердин жана Түзмөктөрдүн эс тутумуна жазуу, резервдик көчүрмөлөрдү түзүү), шифрлөө, форматты өзгөртүү, Колдонуучу тарабынан тандалган алуучуларга өткөрүп берүү жана көрсөтүү, Каналда жарыяланган Контентти Жазылуучуларга жана Каналга жеткиликтүүлүгү бар башка адамдарга жалпыга жеткиликтүү кылуу, ошондой эле Келишимдин 9-бөлүмүндө белгиленген тартипте ЖИ функциялары аркылуу иштеп чыгуу. Колдонуучунун Контенти интеллектуалдык менчик объектиси болуп саналган бөлүгүндө көрсөтүлгөн укук жөнөкөй (өзгөчө эмес) лицензиянын шарттарында берилет. Бул укук Сервисти камсыз кылуу, анын коопсуздугун сактоо жана Мыйзамдардын талаптарын аткаруу максаттарында гана, бардык мамлекеттердин аймагында, Колдонуучунун Контенти Сервисте сакталган мөөнөткө берилет жана ошол эле максаттар үчүн Иштеп чыгуучуларга сублицензия берүү укугун камтыйт.

13.3

Колдонуучунун аты-жөнү, колдонуучу аты жана Аватары Компания тарабынан Келишимдин 6.15-пунктунда белгиленген тартипте башка Колдонуучуларга жана профилге шилтемеси бар адамдарга көрсөтүлүшү мүмкүн.

13.4

Колдонуучу Колдонуучунун Контентин жөнөтүү жана Келишимдин 13.2 жана 13.3-пункттарына ылайык лицензия берүү үчүн зарыл болгон бардык укуктарга жана макулдуктарга ээ экендигин, ошондой эле Колдонуучунун Контенти Мыйзамдарды жана үчүнчү жактардын укуктарын бузбай тургандыгын ырастайт жана кепилдик берет.

13.5

Компания Колдонуучунун Контентин текшербейт жана анын мазмуну, аныктыгы жана Мыйзамдарга ылайык келүүсү үчүн жоопкерчилик тартпайт. Колдонуучунун Контенти үчүн жоопкерчиликти аны жөнөткөн Колдонуучу тартат.

13.6

Эгерде Колдонуучу өз демилгеси менен Компанияга Сервисти жакшыртуу боюнча пикирлерди, идеяларды же сунуштарды жөнөтсө, Компания аларды сый акы төлөбөстөн эркин пайдаланууга укуктуу. Мындай материалдар корголуучу объект болуп саналган көлөмдө, Колдонуучу Компанияга аларды бардык ыкмалар менен, анын ичинде кайра иштеп чыгуу жолу менен пайдаланууга, сублицензия берүү укугу менен, бардык мамлекеттердин аймагында колдонулуучу мөөнөтсүз жана акысыз өзгөчө эмес лицензия берет. Пикирлерди жана сунуштарды жөнөтүү Сервисти пайдалануунун шарты болуп эсептелбейт.

13.7

Компания Колдонуучунун Контентине жеткиликтүүлүктү чектейт же аны Келишимдин 18-бөлүмүндө каралган учурларда гана өчүрөт.

14. ИНТЕЛЛЕКТУАЛДЫК МЕНЧИК. ТИРКЕМЕГЕ ЛИЦЕНЗИЯ. АЧЫК КОДДУУ КОМПОНЕНТТЕР

14.1

Программага карата өзгөчө укуктар, анын ичинде баштапкы жана объекттик код, дизайн, графикалык элементтер, фондук сүрөттөр, стикерлер топтому, «BARS» белгиси жана логотип Укук ээсине таандык. Компания Программаны мыйзамдуу негизде пайдаланат жана ушул бөлүмдө белгиленген көлөмдө Колдонуучуларга BARS Тиркемесин пайдалануу укугун берүүгө укуктуу.

14.2

Компания Колдонуучуга BARS Тиркемесин төмөнкүдөй ыкмалар менен пайдалануу үчүн жөнөкөй (өзгөчө эмес), өткөрүп берилбеген жана кайтарып алынуучу лицензияны берет: Түзмөккө орнотуу (эс тутумуна жазуу), ишке киргизүү жана анын функцияларын Келишимге ылайык максаты боюнча пайдалануу. Лицензия Сервис жеткиликтүү болгон бардык мамлекеттердин аймагында Келишим колдонулган мөөнөткө берилет жана сублицензия берүү укугун камтыбайт. Лицензия акысыз болуп саналат; Акы төлөнүүчү функциялар үчүн төлөм лицензиялык сый акы болуп эсептелбейт.

14.3

Ушул бөлүмгө ылайык Колдонуучуга түздөн-түз берилбеген бардык укуктар берилбеген деп эсептелет.

14.4

Колдонуучу Тиркемени расмий булактардан гана орнотот: App Store, Google Play, Сайт жана тизмеси Сайтта жарыяланган булактар. Компания башка булактардан алынган Тиркеменин көчүрмөлөрү үчүн жоопкерчилик тартпайт.

14.5

Эгерде Мыйзамдарда же Ачык коддуу компонентке карата лицензияда түздөн-түз башкасы каралбаса, Колдонуучуга төмөнкүлөргө тыюу салынат:

  • а)Программаны көчүрүүгө, өзгөртүүгө, декомпиляциялоого, дизассемблирлөөгө же башка жол менен анын баштапкы кодун алууга аракет кылууга;
  • б)Программанын жана Сервистин техникалык коргоо каражаттарын айланып өтүүгө;
  • в)Тиркеменин өзгөртүлгөн версияларын жана Сервиске жетүү үчүн расмий эмес кардар программаларын түзүүгө жана таратууга;
  • г)Сервиске автоматташтырылган каражаттардын (боттордун, скрипттердин) жардамы менен кирүүгө жана башка Колдонуучулардын маалыматтарын чогултууга;
  • д)Программаны атаандаш өнүмдү түзүү үчүн пайдаланууга;
  • е)автордук укуктар жана товардык белгилер жөнүндө маалыматтарды алып салууга же өзгөртүүгө;
  • ж)Компаниянын жазуу жүзүндөгү макулдугусуз«BARS» белгисин, логотипти жана Компаниянын башка жекелештирүү каражаттарын пайдаланууга;
  • з)Тиркемени сатууга, ижарага берүүгө же башка жол менен тескөөгө.
14.6

Тиркеме ачык коддуу компоненттерди камтыйт. Алардын тизмеси, автордук укуктар жөнүндө маалыматтар жана лицензиялардын толук тексттери Тиркеменин «Лицензиялар» бөлүмүндө жеткиликтүү. Ар бир мындай компонент тиешелүү ачык лицензиянын шарттарында пайдаланылат. Келишимдеги эч бир жобо Колдонуучуга мындай лицензия тарабынан берилген укуктарды чектебейт; бул бөлүктө карама-каршылык жаралган учурда ачык лицензиянын шарттары колдонулат. Ачык лицензиялар Программанын калган бөлүктөрүнө жайылтылбайт.

14.7

Ушул бөлүмдүн талаптарын бузуу Мыйзамдарга ылайык жоопкерчиликке алып келет жана Келишимдин 18-бөлүмүндө каралган чараларды колдонууга, ошондой эле Келишимдин 14.2-пунктуна ылайык лицензияны токтотууга негиз болуп саналат.

15. ЖЕКЕ МААЛЫМАТТАР

15.1

Компания Колдонуучулардын жеке маалыматтарын Мыйзамдарга жана Саясатка ылайык иштеп чыгат. Мыйзамдарда каралган маалыматтарды иштеп чыгуу жөнүндө толук маалымат Саясатта камтылган.

15.2

Маалыматтарды иштеп чыгуунун башкы укуктук негизи Келишимди түзүүнүн жана аткаруунун зарылдыгы болуп саналат. Башка негиздер, атап айтканда мыйзамда белгиленген милдеттерди аткаруу жана Компаниянын мыйзамдуу кызыкчылыктары Саясатта көрсөтүлөт. Акцепт жеке маалыматтарды иштеп чыгууга берилген макулдук болуп эсептелбейт. Макулдук өзүнчө жана башка укуктук негиз жок болгон максаттар үчүн гана суралат (5-тиркеме).

15.3

Компания Колдонуучулардын маалыматтарын төмөнкү максаттарда иштетет:

  • а)Каттоо, авторизациялоо жана Верификация жүргүзүү үчүн;
  • б)Билдирүүлөрдү өткөрүп берүү жана сактоо, Чалууларды камсыз кылуу жана Топтордун иштешин камсыздоо үчүн;
  • в)ЖИ функцияларынын иштешин камсыз кылуу үчүн;
  • г)техникалык колдоо көрсөтүү, кайрылууларды, даттанууларды жана талаштарды кароо үчүн;
  • д)Сервистин коопсуздугун жана Санарип туруктуулугун камсыз кылуу, алдамчылыктын, спамдын жана кыянаттык менен пайдалануунун алдын алуу, ошондой эле Инциденттерге чара көрүү үчүн;
  • е)Компаниянын Мыйзамдар боюнча милдеттерин аткаруу үчүн, анын ичинде Кыргыз Республикасынын Санарип кодексинин 114-беренесинин 4-бөлүгүнө ылайык Санарип жазууларды сактоо жана Ыйгарым укуктуу органдардын мыйзамдуу талаптарын аткаруу үчүн;
  • ж)Компаниянын укуктарын жана мыйзамдуу кызыкчылыктарын коргоо, талаптарды коюу жана алардан коргонуу үчүн;
  • з)сервистик билдирүүлөрдү жөнөтүү үчүн;
  • и)жекелештирилбеген маалыматтардын негизинде Сервисти өнүктүрүү жана жакшыртуу үчүн;
  • к)Колдонуучу 5-тиркемеге ылайык өзүнчө макулдук берген максаттар үчүн.
15.4

Эгерде Колдонуучу Сервис аркылуу башка адамдардын жеке маалыматтарын өткөрүп берсе, мындай өткөрүп берүү үчүн мыйзамдуу негиздин болушу боюнча жоопкерчиликти өзү тартат.

15.5

Сервистин маалыматтары Кыргыз Республикасынын аймагында сакталат. Өзүнчө маалыматтар Келишимди аткаруу үчүн зарыл болгон учурларда (мисалы, операциялык системаларды өндүрүүчүлөрдүн сервистери аркылуу push-билдирүүлөрдү жеткирүү үчүн техникалык идентификаторлорду өткөрүп берүүдө) же Мыйзамдарда каралган башка негиздер боюнча чет өлкөлөргө өткөрүлүшү мүмкүн. Мындай өткөрүп берүүлөрдүн тизмеси Саясатта көрсөтүлөт.

16. ЖАРНАМА, МААЛЫМАТТЫК БИЛДИРҮҮЛӨР ЖАНА АКЫ ТӨЛӨНҮҮЧҮ ФУНКЦИЯЛАР

16.1

Компания Колдонуучуга өзүнчө макулдуксуз төмөнкү сервистик билдирүүлөрдү жөнөтөт: Эсептик жазуунун коопсуздугу жөнүндө, Келишимдин өзгөрүшү жөнүндө, Техникалык иштер жана Инциденттер жөнүндө, даттанууларды кароонун жүрүшү жөнүндө жана Келишимди аткарууга байланыштуу башка билдирүүлөр. Сервистик билдирүүлөр жарнама болуп эсептелбейт.

16.2

Акцепт жасоо менен Колдонуучу Тиркеменин интерфейсинде жайгаштырылган, анын ичинде баннерлер жана жарнамалык блоктор түрүндөгү, Колдонуучунун жеке маалыматтарын иштеп чыгууга негизделбеген жекелештирилбеген жарнаманы алууга алдын ала макулдук берет. Мындай макулдукту тастыктаган Санарип жазуу Компанияда сакталган Акцепт жөнүндө жазуу болуп саналат.

16.3

Сервистеги жарнама Кыргыз Республикасынын «Жарнама жөнүндө» Мыйзамынын талаптарын сактоо менен таратылат. Компания жарнаманы таратуучу катары жарнаманы жайгаштыруунун убактысы, орду жана каражаттары үчүн гана жооп берет; жарнаманын мазмуну үчүн жарнама берүүчү жоопкерчилик тартат. Компания жарнама берүүчүлөрдүн товарлары жана кызматтары үчүн жооп бербейт жана Колдонуучулардын алар менен болгон бүтүмдөрүнүн тарабы болуп эсептелбейт.

16.4

Компания Акы төлөнүүчү функцияларды (жазылууларды, бизнес-аккаунттарды, акы төлөнүүчү стикерлерди, илгерилетүү кызматтарын жана башка функцияларды) киргизүүгө укуктуу. Ар бир Акы төлөнүүчү функциянын шарттары (мазмуну, баасы, төлөө жана кайтаруу тартиби) сатыкка чыгарылганга чейин Тиркемеде же Сайтта жарыяланат жана мындай функция үчүн төлөм жүргүзгөн Колдонуучу үчүн Келишимдин бөлүгү болуп калат.

16.5

Акы төлөнүүчү функциялардын баасы Кыргыз Республикасынын улуттук валютасы менен көрсөтүлөт жана түздөн-түз башкасы көрсөтүлбөсө, колдонулуучу салыктарды камтыйт. Төлөм Тиркемеде көрсөтүлгөн төлөм сервистери аркылуу гана накталай эмес тартипте жүргүзүлөт. Компания төлөм сервистеринин иштеши жана акча каражаттарынын эсепке түшүү мөөнөттөрү үчүн жооп бербейт.

16.6

Акы төлөнүүчү функциядан баш тарткан учурда Колдонуучу-керектөөчү баш тарткан күнгө чейин пайдаланылган мезгилдин наркы кармалгандан кийин төлөнгөн акча каражаттарын кайтарып алууга укуктуу. Акча каражаттары төлөм жүргүзүлгөн ошол эле ыкма менен, Акы төлөнүүчү функциянын шарттарында жана Мыйзамдарда белгиленген мөөнөттөрдө кайтарылат.

16.7

Сервистин акысыз функциясын акы төлөнүүчү функцияга өткөрүү Келишимдин 23-бөлүмүндө белгиленген тартипте жүзөгө ашырылат.

17. БИЛДИРҮҮЛӨР ЖАНА ТАРАПТАРДЫН ӨЗ АРА БАЙЛАНЫШЫ

17.1

Компания Колдонуучуга төмөнкү ыкмалардын каалаганы аркылуу билдирүүлөрдү жөнөтөт: Тиркемедеги билдирүү (анын ичинде BARS расмий Эсептик жазуусу аркылуу), push-билдирүү, Телефон номерине SMS-билдирүү, электрондук почта дарегине кат (эгер көрсөтүлгөн болсо) же Сайтта жана Тиркемеде жарыялоо жолу менен (бардык Колдонуучуларга арналган билдирүүлөр үчүн).

17.2

Акцепт жасоо менен Колдонуучу Телефон номерин жана башка байланыш маалыматтарын Келишимди түзүүгө, аткарууга, өзгөртүүгө жана токтотууга байланыштуу билдирүүлөрдү жөнөтүү үчүн пайдаланууга алдын ала макулдук берет.

17.3

Билдирүү Колдонуучу тарабынан алынган болуп эсептелет:

  • а)Тиркемедеги билдирүү, push-билдирүү же SMS-билдирүү үчүн - жөнөтүлгөн учурдан тартып;
  • б)электрондук почтага жөнөтүлгөн кат үчүн - жөнөтүлгөн күндөн кийинки Иш күнүнөн тартып;
  • в)Сайтта жана Тиркемеде жарыяланган билдирүү үчүн - жайгаштырылган учурдан тартып.
17.4

Колдонуучу тарабынан билдирүүлөр өчүрүлгөндүктөн, Телефон номеринин актуалдуу болбогондугунан же Колдонуучунун тарабындагы башка жагдайлардан улам билдирүүнүн алынбай калышы анын юридикалык күчүн жоготпойт.

17.5

Колдонуучу Компанияга кайрылууларды жана билдирүүлөрдү Келишимдин 2.1-пунктунун «г» подпунктунда көрсөтүлгөн байланыш каналдары аркылуу жөнөтөт. Кайрылуу кайрылууларды эсепке алуу системасында катталган учурдан тартып Компания тарабынан алынган болуп эсептелет, бул тууралуу Колдонуучуга кайрылуунун номери билдирилет; жумуш убактысынан тышкары келип түшкөн кайрылуу жакынкы Иш күнү алынган болуп эсептелет.

17.6

Ушул бөлүмдө каралган тартипте жөнөтүлгөн билдирүүлөр жана кайрылуулар жазуу жүзүндө жасалган болуп эсептелет. Кат алышуу Колдонуучунун тандоосу боюнча кыргыз же орус тилинде жүргүзүлөт.

18. ЖЕТКИЛИКТҮҮЛҮКТҮ ЧЕКТӨӨ ЖАНА КОНТЕНТТИ ӨЧҮРҮҮ

18.1

Компания Келишимди бузган Колдонуучунун Сервисти пайдалануу мүмкүнчүлүгүн бузуу жоюлганга чейин убактылуу токтотууга укуктуу. Бузуунун мүнөзүнө жана кайталанышына жараша Компания төмөнкү чаралардын бирин же бир нечесин колдонушу мүмкүн:

  • а)эскертүү;
  • б)айрым функцияларды чектөө (мисалы, жаңы байланыштарга Билдирүүлөрдү жөнөтүү, Топ түзүү, ЖИ функцияларын пайдалануу);
  • в)Эсептик жазууга жеткиликтүүлүктү убактылуу токтотуу;
  • г)одоно же бир нече жолу кайталанган бузуу үчүн Компания тарабынан Келишимди бир тараптуу тартипте аткаруудан баш тартуу менен Эсептик жазууну бөгөттөө;
  • д)Келишимдин 18.3-пунктунда көрсөтүлгөн негиздер болгон учурда Колдонуучунун Контентине жеткиликтүүлүктү чектөө же аны өчүрүү.
18.2

Келишимди одоно бузуу болуп төмөнкүлөр эсептелет:

  • а)2-тиркеменин 2-бөлүмүндө көрсөтүлгөн, жайылтылышына Мыйзамдар менен тыюу салынган маалыматтарды таратуу;
  • б)алдамчылык, башка адамдардын Ырастоо коддорун, сырсөздөрүн же төлөм маалыматтарын алууга аракет кылуу;
  • в)Билдирүүлөрдү, анын ичинде жарнамалык билдирүүлөрдү уруксатсыз массалык жөнөтүү (Кыргыз Республикасынын «Жарнама жөнүндө» Мыйзамынын 5-беренесинин 9-бөлүгү);
  • г)Сервиске, башка адамдардын Эсептик жазууларына уруксатсыз кирүүгө же Сервистин ишине кийлигишүүгө аракет кылуу;
  • д)өзүн башка адам, мамлекеттик орган же Компания катары көрсөтүү;
  • е)Эсептик жазууну башка адамга сатуу же өткөрүп берүү;
  • ж)Келишимдин 5.6-пунктунун «а» жана «б» подпункттарында каралган ырастоолордун чындыкка дал келбеши;
  • з)12 (он эки) айдын ичинде Эрежелерди үчүнчү жана андан кийинки жолу бузуу.
18.3

Компания Колдонуучунун Контентине жеткиликтүүлүктү чектейт же аны төмөнкү учурларда гана өчүрөт:

  • а)Колдонуучунун Контенти Мыйзамдарда жайылтылышына тыюу салынган маалыматтарды камтыса;
  • б)соттун чечими же Ыйгарым укуктуу органдын мыйзамдуу талабы муну талап кылса;
  • в)укук ээсинин же сүрөткө болгон укуктары, жеке жашоонун купуялуулугу, ар-намысы, кадыр-баркы же ишкердик бедели бузулган адамдын негиздүү даттануусу келип түшүп, ал 3-тиркемеде белгиленген тартипте каралган болсо.
18.4

Чаралар техникалык жактан мүмкүн болгон көлөмдө колдонулат. Колдонуучулардын Түзмөктөрүндө сакталган Контент Компания үчүн жеткиликсиз бойдон калышы мүмкүн.

18.5

Эсептик жазууга уруксатсыз кирүүнүн белгилери болгон учурда Компания Колдонуучунун кызыкчылыгында анын инсандыгы Келишимдин 6.14-пунктунда белгиленген тартипте ырасталганга чейин Эсептик жазууга жеткиликтүүлүктү убактылуу чектөөгө укуктуу. Мындай чара укук бузуу үчүн жоопкерчилик чарасы болуп эсептелбейт.

18.6

Ушул бөлүмдө каралган чараларды колдонуу Компания тарабынан Келишимди бузуу болуп эсептелбейт жана Колдонуучуга компенсация талап кылуу укугун бербейт. Эгерде Эсептик жазуу бузуу үчүн бөгөттөлсө, Акы төлөнүүчү функциялар боюнча пайдаланылбай калган мезгил үчүн төлөнгөн акча каражаттары, эгерде мындай эсептешүүгө Мыйзамдар тыюу салбаса, Компанияга келтирилген чыгымдарды алып салуу менен кайтарылат.

18.7

Эсептик жазуу бөгөттөлгөн учурда Компания өз талаптарын коюу жана алардан коргонуу үчүн зарыл болгон маалыматтарды Саясатта көрсөтүлгөн мөөнөттөр ичинде сактоого укуктуу.

19. СЕРВИСТИН ЖЕТКИЛИКТҮҮЛҮГҮ. ТЕХНИКАЛЫК ИШТЕР. ИНЦИДЕНТТЕР

19.1

Тараптар Компания Сервистин күнү-түнү үзгүлтүксүз иштешин камсыз кылууга аракет кыларын, бирок анын үзгүлтүксүз жана катасыз иштешине кепилдик бербестигин түздөн-түз макулдашышат. Сервис толугу менен же жарым-жартылай жеткиликсиз болушу мүмкүн, анын ичинде төмөнкү учурларда:

  • а)пландуу жана авариялык оңдоо-профилактикалык иштер жүргүзүлгөн учурда (мындан ары – «Техникалык иштер»);
  • б)Инциденттер келип чыккан учурда, анын ичинде үчүнчү жактардын аракеттеринен улам келип чыккан Инциденттерде;
  • в)маалыматтарды иштеп чыгуу борборлорунун, байланыш операторлорунун, Интернет тармагынын, тиркемелер дүкөндөрүнүн жана башка үчүнчү жактардын ишинде үзгүлтүктөр пайда болгон учурда;
  • г)Ыйгарым укуктуу органдардын чечими боюнча телекоммуникациялык тармактардын иши токтотулган же жеткиликтүүлүк чектелген учурда;
  • д)Сыноо мезгилинде;
  • е)жеңүүгө мүмкүн болбогон күч жагдайлары келип чыккан учурда.
19.2

Сервистин ишинде үзгүлтүктөргө алып келиши мүмкүн болгон пландуу Техникалык иштер жөнүндө Компания алардын башталышына чейин кеминде 3 (үч) Жумуш күнү мурда Сайтта же Тиркемеде маалымдайт. Авариялык Техникалык иштер алдын ала билдирүүсүз жүргүзүлөт.

19.3

Авария же Сервистин иштешине таасир эткен башка Инцидент келип чыккан учурда Компания Сайтта же Тиркемеде Инцидент жөнүндө, анын Сервиске тийгизген таасири тууралуу жана аны жоюунун болжолдонгон мөөнөттөрү жөнүндө маалымдайт.

19.4

Жеке маалыматтардын сыртка чыгып кетүүсү жөнүндө Компания Саясатта каралган тартипте жабыр тарткан Колдонуучуларга маалымдайт.

19.5

Сервистин Санарип туруктуулугун камсыз кылуу Компаниянын жана Колдонуучулардын биргелешкен милдети болуп саналат .

20. ТАРАПТАРДЫН ЖООПКЕРЧИЛИГИ

20.1

Тараптар ушул Келишимде жана Мыйзамдарда белгиленген чектөөлөрдү эске алуу менен Келишимди аткарбаганы же талаптагыдай аткарбаганы үчүн Келишимге жана Мыйзамдарга ылайык жоопкерчилик тартышат.

20.2

Компания төмөнкүлөр үчүн жоопкерчилик тартпайт:

  • а)Колдонуучулардын Контенти, алардын аракеттери же аракетсиздиги, анын ичинде Топтордогу аракеттери же аракетсиздиги, ошондой эле Колдонуучулардын ортосундагы бүтүмдөр үчүн;
  • б)Келишимдин 8.10, 8.12 жана 8.13-пункттарында көрсөтүлгөн жагдайлардан улам Билдирүүлөрдүн тарыхынын жеткиликсиздиги үчүн;
  • в)ЖИ функцияларынын натыйжаларынын тактыгы жана Колдонуучу ошол натыйжалардын негизинде кабыл алган чечимдердин кесепеттери үчүн (Келишимдин 9.4-пункту);
  • г)Келишимдин 19.1-пунктунда көрсөтүлгөн жагдайлардан улам келип чыккан Сервистин жеткиликсиздиги үчүн, эгерде мындай жеткиликсиздик Компаниянын күнөөсүнөн келип чыкпаса;
  • д)Келишимдин 7.7-пунктунда көрсөтүлгөн үчүнчү жактардын сервистеринин иштеши үчүн;
  • е)Колдонуучуга көз каранды болгон себептерден улам үчүнчү жактардын Эсептик жазууга же Түзмөккө жеткиликтүүлүгүнүн кесепеттери үчүн (Келишимдин 6.4 жана 6.10-пункттары);
  • ж)Түзмөктүн Келишимдин 7.6-пунктунда белгиленген талаптарга жооп бербеши жана Тиркеменин расмий эмес көчүрмөлөрүнүн колдонулушу үчүн;
  • з)Сервисти ишкердик ишмердүүлүккө байланыштуу пайдаланган Колдонуучунун чыгымдары жана колдон чыгарылган пайдасы үчүн (Келишимдин 5.7-пункту);
  • и)Ыйгарым укуктуу органдардын мыйзамдуу талаптарын аткаруу жана Келишимдин 18-бөлүмүндө каралган чараларды колдонуу үчүн.
20.3

Тараптар Сервистин жеткиликсиздиги үчүн Компаниянын жоопкерчилигинин төмөнкү көлөмүн белгилешет:

  • а)Сервистин акысыз функциялары жеткиликсиз болгон учурда жоопкерчилик жаралбайт, анткени мындай функциялардын баасы нөлгө барабар;
  • б)Компаниянын күнөөсү боюнча Акы төлөнүүчү функция 24 (жыйырма төрт) сааттан ашык үзгүлтүксүз жеткиликсиз болгон учурда, жеткиликсиздик мезгили үчүн анын баасы пропорционалдуу түрдө кайра эсептелет (азаят), бирок мындай мезгил үчүн ошол функциянын баасынан ашпоого тийиш.

Келишимдин 19.2-пунктуна ылайык жүргүзүлгөн Техникалык иштердин убактысы жоопкерчиликтин өлчөмүн аныктоодо эсепке алынбайт.

20.4

Келишимге байланыштуу бардык талаптар боюнча Компаниянын Колдонуучунун алдындагы жалпы жоопкерчилигинин өлчөмү төмөнкү суммалардын чоңунан ашпоого тийиш: талап коюлган күнгө чейинки акыркы 12 (он эки) ай ичинде Колдонуучу тарабынан Акы төлөнүүчү функциялар үчүн иш жүзүндө төлөнгөн сумма; же 100 (жүз) эсептик көрсөткүч.

20.5

Колдонуучу Келишимди же Мыйзамдарды бузуу менен Компанияга келтирилген чыгымдардын ордун толук көлөмдө толтуруп берет, анын ичинде: Колдонуучунун Контентине же аракеттерине байланыштуу талаптар боюнча Компания үчүнчү жактарга төлөгөн суммаларды; мындай аракеттердин натыйжасында Компанияга салынган айып пулдарды;юридикалык коргонууга кеткен негиздүү чыгымдарды.Эгерде Компанияга Колдонуучунун аракеттерине байланыштуу талап коюлса, Колдонуучу Компаниянын талабы боюнча түшүндүрмөлөрдү жана далилдерди берүүгө, ошондой эле процесстик мыйзамдар жол берген учурларда талаш-тартышка Компаниянын тарабында катышууга милдеттүү.

21. ЖЕҢҮҮГӨ МҮМКҮН БОЛБОГОН КҮЧ ЖАГДАЙЛАРЫ

21.1

Эгерде Тарап өз милдеттенмелерин аткарбай калуусу белгилүү шарттарда өзгөчө жана алдын алууга мүмкүн болбогон жагдайлардан улам келип чыкса, ал жоопкерчиликтен бошотулат. Мындай жагдайларга, атап айтканда, табигый кырсыктар, өрттөр, энергия менен камсыздоо тутумдарындагы авариялар, согуш аракеттери, массалык башаламандыктар, эпидемиялар, мамлекеттик органдардын актылары жана аракеттери (анын ичинде телекоммуникациялык тармактардын ишин токтотуу), акылга сыярлык коргонуу чаралары жетишсиз болуп чыккан ири масштабдагы киберчабуулдар, маалыматтарды иштеп чыгуу борборлорунун жана магистралдык байланыш тармактарынын ишиндеги үзгүлтүктөр, ошондой эле Сервистин ишине таасир этүүчү санкциялык чектөөлөр кирет.

21.2

Компания мындай жагдайлар жөнүндө Колдонуучуларга Келишимдин 19.3-пунктунда белгиленген тартипте маалымдайт. Милдеттенмелерди аткаруу мөөнөтү мындай жагдайлар жана алардын кесепеттери колдонулган мезгилге жылдырылат.

21.3

Эгерде жеңүүгө мүмкүн болбогон күч жагдайлары катары менен 3 (үч) айдан ашык убакытка созулса, ар бир Тарап Келишимдин 24-бөлүмүндө белгиленген тартипте Келишимден баш тартууга укуктуу.

22. КУПУЯЛУУЛУК

22.1

Компания Колдонуучулар жөнүндө маалыматтардын купуялуулугун Келишимдин 8 жана 15-бөлүмдөрүнө, ошондой эле Саясатка ылайык сактайт.

22.2

Компаниянын купуя маалыматы болуп Колдонуучуга Келишимди аткарууга байланыштуу белгилүү болгон, жалпыга жеткиликтүү эмес маалыматтар эсептелет: Сервистин сыноо версиясы жана жарыялана элек функциялары жөнүндө маалыматтар, Сервистин аялуу жактары жөнүндө маалыматтар, Колдоо кызматы менен болгон кат алышуулардын мазмуну, ошондой эле Компания тарабынан купуя деп белгиленген башка маалыматтар. Колдонуучу мындай маалыматтарды ачыкка чыгарбоого жана таратпоого милдеттүү.

22.3

Келишимдин 22.2-пунктунда каралган милдеттенме төмөнкү маалыматтарга жайылтылбайт: Колдонуучунун күнөөсү жок жалпыга жеткиликтүү болуп калган маалыматтарга; купуялуулукту сактоо милдеттенмеси жок башка булактардан өз алдынча алынган маалыматтарга; мыйзамдын талабына ылайык ачыкка чыгарылууга тийиш болгон маалыматтарга жана Колдонуучунун өз укуктарын коргоо үчүн Ыйгарым укуктуу органдарга кайрылуусуна.

22.4

Келишимдин 22.2-пунктунда белгиленген милдеттенме Келишим күчүндө болгон мезгилде жана ал токтотулгандан кийин 3 (үч) жыл бою сакталат. Бул милдеттенмени бузган Колдонуучу Компанияга келтирилген чыгымдардын ордун толтурууга милдеттүү.

23. КЕЛИШИМГЕ ӨЗГӨРТҮҮЛӨРДҮ КИРГИЗҮҮ

23.1

Компания ушул бөлүмдө белгиленген тартипти сактоо менен Келишимге, анын ичинде Тиркемелерге бир тараптуу тартипте өзгөртүүлөрдү киргизүүгө укуктуу.

23.2

Компания Колдонуучуларды Келишимге киргизилген өзгөртүүлөр жөнүндө Келишимдин 17-бөлүмүндө белгиленген тартипте алар күчүнө кирген күнгө чейин кеминде 1 (бир) ай мурда маалымдайт.

23.3

Эгерде өзгөртүүлөр күчүнө кирген күнгө чейин Колдонуучу макул эместигин билдирбесе, Келишим билдирүүдө көрсөтүлгөн күндөн тартып өзгөртүлгөн болуп эсептелет. Ошол күндөн кийин Сервисти пайдаланууну улантуу Колдонуучунун макулдугун кошумча ырастайт.

23.4

Эгерде Колдонуучу өзгөртүүлөр күчүнө киргенге чейин алардын менен макул эместигин Колдоо кызматы аркылуу же Тиркеменин жөндөөлөрү аркылуу билдирсе, Келишим токтотулат жана Келишимдин 24.3-пунктунда белгиленген тартип колдонулат. Компания Колдонуучуга Акы төлөнүүчү функциялар үчүн төлөнгөн акча каражаттарын, макул эместик жөнүндө билдирүү алынганга чейинки мезгилдеги Сервистин наркын кармап калгандан кийин кайтарып берет.

23.5

Эгерде өзгөртүүлөрдүн эртерээк күчүнө кириши Мыйзамдардын талаптары менен түздөн-түз шартталса, мындай өзгөртүүлөр Мыйзамдарда белгиленген мөөнөттө күчүнө кирет. Келишимдин 2.4-пунктунда көрсөтүлгөн маалыматтарды өзгөртүү, Келишимдин 7.4-пунктуна ылайык Сервисти өзгөртүү жана Келишимдин 6.2-пунктуна ылайык телефон номерлеринин тизмесин кеңейтүү Келишимге өзгөртүү киргизүү болуп эсептелбейт.

23.6

Келишимден айырмаланган жеке шарттар Компаниянын ыйгарым укуктуу өкүлү кол койгон жазуу жүзүндөгү документ менен таризделген учурда гана жарактуу болот. Колдоо кызматынын кызматкерлеринин билдирүүлөрү жана жарнамалык материалдардагы маалыматтар Келишимди өзгөртпөйт.

23.7

Келишимге төмөнкү өзгөртүүлөр киргизилген учурда ушул Келишимдин 23.2-23.4-пункттарындагы тартипти сактоо талап кылынат:

  • а)Колдонуучу үчүн жаңы милдеттерди, тыюу салууларды же чектөөлөрдү белгилөө же мурдагы милдеттерди кеңейтүү;
  • б)Колдонуучунун жоопкерчилигинин негиздерин же чараларын, Сервиске жеткиликтүүлүктү чектөөнүн же Колдонуучунун Контентин өчүрүүнүн негиздерин кеңейтүү;
  • в)Компаниянын жоопкерчилигинин көлөмүн азайтуу же Колдонуучунун Келишимде белгиленген укуктарын кыскартуу;
  • г)жеке маалыматтарды иштеп чыгуунун жаңы максаттарын, түрлөрүн же ыкмаларын, жаңы категорияларын киргизүү же аларды сактоо мөөнөттөрүн узартуу;
  • д)Сервистин акысыз функциясын акы төлөнүүчү функцияга өткөрүү же мурда төлөнгөн мезгил үчүн Акы төлөнүүчү функциянын баасын жогорулатуу;
  • е)Тараптардын укуктарын жана милдеттерин башка жол менен өзгөртүү.
23.8

Төмөнкүлөр Келишимге өзгөртүү киргизүү болуп эсептелбейт жана Компания тарабынан 23.2-23.4-пункттарда белгиленген тартипти сактабастан жүзөгө ашырылышы мүмкүн:

  • а)Келишимдин 7.4-пунктуна ылайык Сервистин функцияларын кошуу, өзгөртүү, токтотуу, анын интерфейсин, дизайнын, техникалык мүнөздөмөлөрүн жана лимиттерин өзгөртүү, эгерде бул өзгөртүүлөр Келишимдин 23.7-пунктунда көрсөтүлгөн кесепеттерге алып келбесе;
  • б)Келишимде мурунтан каралган функцияларды ишке киргизүү, анын ичинде «эгерде бул Тиркеменин функцияларында каралган болсо» деген эскертүү менен көрсөтүлгөн функцияларды;
  • в)Компания жөнүндө маалыматтарды Келишимдин 2.4-пунктуна ылайык жаңыртуу;
  • г)Келишимдин 6.2-пунктуна ылайык уруксат берилген телефон номерлеринин жана өлкөлөрдүн тизмесин кеңейтүү;
  • д)Келишимдин 9.7-пунктуна ылайык ЖИ функцияларынын жана алардын Провайдери жөнүндө маалыматтарды, ошондой эле Саясатка ылайык Иштеп чыгуучулардын тизмесин жаңыртуу, эгерде 23.7-пункттун «г» подпунктунда көрсөтүлгөн кесепеттер келип чыкпаса;
  • е)Келишимдин 16.4-пунктуна ылайык жаңы Акы төлөнүүчү функциялардын шарттарын белгилөө;
  • ж)Колдонуучунун абалын жакшырткан жана ага жаңы милдеттерди жаратпаган өзгөртүүлөр;
  • з)Келишимдин жоболорунун маанисин өзгөртпөгөн орфографиялык, техникалык жана редакциялык каталарды оңдоо.

24. КЕЛИШИМДИН КОЛДОНУУ МӨӨНӨТҮ ЖАНА ТОКТОТУЛУШУ. ЭСЕПТИК ЖАЗУУНУ ӨЧҮРҮҮ

24.1

Келишим Акцепт жасалган учурдан тартып мөөнөтсүз колдонулат.

24.2

Келишим төмөнкү учурларда токтотулат:

  • а)Колдонуучу каалаган убакта Тиркемеде Эсептик жазууну өчүрүү аркылуу (эгерде мындай функция бар болсо) же Колдоо кызматы аркылуу Сервистен баш тарткан учурда;
  • б)Компания Келишимдин 18.1-пунктунун «г» подпунктунда, ошондой эле 21.3, 24.5 жана 24.6-пункттарында каралган учурларда Келишимди бир тараптуу аткаруудан баш тарткан учурда;
  • в)Келишимдин 23.4-пунктунда каралган учурда;
  • г)Мыйзамдарда каралган башка негиздер боюнча.
24.3

Колдонуучу Сервистен баш тарткандан кийин Компания:

  • а)Акы төлөнүүчү функциялар үчүн кайтарылууга тийиш болгон сумманы эсептейт, эгерде алар үчүн төлөм жүргүзүлгөн болсо;
  • б)Колдонуучуга Компанияда анын кайсы Санарип жазуулары сакталып турганын жана алардын көчүрмөсүн кантип алууга же башка сервиске өткөрүүгө болорун маалымдайт;
  • в)мындай жазууларды өчүрүүгө мүмкүнчүлүк берет жана алардын өчүрүлүшүн камсыз кылат;
  • г)Колдонуучунун чечими алынганга чейин жазууларды өзгөртүүсүз сактайт;
  • д)эгерде Колдонуучудан чечим алынбаса, баш тартуу жөнүндө билдирүү алынган жылдан кийинки календардык жыл аяктагандан кийин жазууларды өчүрөт;
  • е)Мыйзамдарга ылайык сакталууга тийиш болгон маалыматтар жөнүндө, анын ичинде Келишимдин 5.8-пунктунда көрсөтүлгөн жазуулар жөнүндө Колдонуучуга маалымдайт.
24.4

Эсептик жазуу өчүрүлгөндө Колдонуучунун профили өчүрүлөт, ал эми анын колдонуучу аты башка Колдонуучуга берилиши мүмкүн. Колдонуучу мурда башка Колдонуучуларга же Топторго жөнөткөн Билдирүүлөр алардын алуучуларына жеткиликтүү бойдон калышы мүмкүн. Эсептик жазуу өчүрүлгөнгө чейин Колдонуучу Келишимдин 8.10-пунктуна ылайык өзүнүн Билдирүүлөрүн өчүрүүгө укуктуу.

24.5

Эгерде Колдонуучу Эсептик жазууга катары менен 12 айдан ашык убакыт кирбесе, Компания Келишимден баш тартууга жана Эсептик жазууну өчүрүүгө укуктуу.

24.6

Компания бардык Колдонуучуларга Сервисти көрсөтүүнү токтотууга укуктуу, бул тууралуу Колдонуучуларга алдын ала, алардын Келишимдин 24.3-пунктунда каралган мүмкүнчүлүктөрдү пайдаланууга жана Акы төлөнүүчү функциялар үчүн пайдаланылбаган мезгил боюнча акча каражаттарын кайтарып алууга жетиштүү болгон акылга сыярлык мөөнөттө билдирет.

24.7

Келишимдин токтотулушу Тараптарды ал токтотулганга чейин жол берилген бузуулар үчүн жоопкерчиликтен бошотпойт. Келишим токтотулгандан кийин дагы Келишимдин 5.8 жана 13.6-пункттары, 14, 20, 22 жана 25-бөлүмдөрү, ошондой эле маалыматтарды сактоо боюнча Саясаттын жоболору күчүндө калат.

25. КАЙРЫЛУУЛАР, ДООМАТТАР ЖАНА ТАЛАШ-ТАРТЫШТАРДЫ ЧЕЧҮҮ. КОЛДОНУЛУУЧУ УКУК

25.1

Колдонуучунун жарандыгына жана турган жерине карабастан, ушул Келишимге жана Тараптардын ортосундагы мамилелерге Кыргыз Республикасынын мыйзамдары колдонулат.

25.2

Тармактык жөнгө салуучу органга же сотко кайрылганга чейин Колдонуучу Компанияга 3-тиркемеде белгиленген тартипте даттануу же доомат жөнөтүүгө милдеттүү. Аларды кароо мөөнөттөрү төмөнкүлөрдү түзөт:

  • а)Сервистин сапатына, укуктардын же Эрежелердин бузулушуна байланыштуу даттануу боюнча чаралар 5 (беш) Жумуш күнүнөн ашпаган мөөнөттө көрүлөт;
  • б)акчалай доомат боюнча - Компания аны алган күндөн тартып 10 (он) календардык күндүн ичинде;
  • в)жеке маалыматтардын субъектинин суроо-талабы боюнча - Саясатта белгиленген мөөнөттөрдө.
25.3

Компаниянын даттануу же талаш боюнча чечимине карата тиешелүү тармактык жөнгө салуучу органга милдеттүү сотко чейинки тартипте даттанууга болот, ал эми анын чечими менен макул болбогон учурда - сотко кайрылууга болот.

25.4

Келишимдин 25.2 жана 25.3-пункттарында белгиленген тартипте жөнгө салынбаган талаштар Компаниянын жайгашкан жери боюнча сот тарабынан каралат.

25.5

Сервистин Санарип жазуулары (авторизация журналдары, Акцепт жөнүндө жазуулар, маалыматтар жана кайтарылып алынган макулдуктар жөнүндө жазуулар, билдирүүлөр жана даттанууларды кароо жөнүндө жазуулар) Тараптар тарабынан жол берилүүчү далилдер катары таанылат.

26. ЖЫЙЫНТЫКТООЧУ ЖОБОЛОР

26.1

Эгерде Келишимдин кайсы бир жобосу жараксыз деп табылса, бул Келишимдин башка жоболорунун жараксыз болушуна алып келбейт. Жараксыз жобо Тараптардын ниетине мааниси боюнча мүмкүн болушунча жакын келген Мыйзамдардын жобосу менен алмаштырылат.

26.2

Компаниянын Келишим боюнча өз укугун пайдаланбашы ал укуктан баш тарткандыгын билдирбейт.

26.3

Колдонуучу Компаниянын жазуу жүзүндөгү макулдугусуз Келишим боюнча өзүнүн укуктарын жана милдеттерин үчүнчү жактарга өткөрүп берүүгө укуктуу эмес.

26.4

Компания Келишим боюнча өзүнүн укуктарын жана милдеттерин толугу менен же жарым-жартылай аффилирленген жакка, укук улантуучуга же Сервисти көрсөтүү боюнча ишмердүүлүк өткөрүлүп берилген жакка өткөрүп берүүгө укуктуу. Акцепт жасоо менен Колдонуучу мындай өткөрүп берүүгө, анын ичинде карызды которууга алдын ала макулдугун берет. Компания мындай өткөрүп берүү жөнүндө Колдонуучуларга ал жүзөгө ашырылганга чейин кеминде 30 (отуз) календардык күн мурда билдирет. Өткөрүп берүүгө макул болбогон Колдонуучу Келишимдин 24.2-пунктунун «а» подпунктунда белгиленген тартипте Сервистен баш тартууга укуктуу. Өткөрүп берүү учурунда жеке маалыматтар жаңы кызмат көрсөтүүчү тарабынан ошол эле максаттарда жана ошол эле шарттарда иштетилет.

26.5

Ушул Келишим анын предметине байланыштуу Тараптардын толук макулдашуусун билдирет жана ага чейин жетишилген бардык макулдашуулардын ордун алмаштырат. Келишим менен жөнгө салынбаган маселелер Мыйзамдарга ылайык чечилет.

26.6

Компаниянын реквизиттери:

«Кикшеринг Борбордук Азия» Ачык акционердик коому
Юридикалык дареги: Кыргыз Республикасы, Бишкек шаары, Биринчи Май району,
Кулатов көчөсү, 61, 5-кабат, 501-кабинет.
СТН: 00103202410032 Каттоо номери: 300144-3301-ЖАК ОКПО: 32655398
Банктык реквизиттери:
Эсеп Реквизиттери: KGS 1240020001522704
Алуучу банктын БИК: 124030
Алуучунун Банкы: ОАО "БАКАЙ БАНК"
Алуучу: KGS 1240020001522704 «Кикшеринг Борбордук Азия» Ачык акционердик коому
Электрондук почтасы: info@kicksharing.asia Телефону: + 996 220 95 45 45
Сайты: https://bars.kg

1-Тиркеме

Купуялуулук жана жеке маалыматтарды иштеп чыгуу саясаты

«BARS» мессенджеринин Колдонуучу келишимине карата. Баш тамга менен жазылган терминдер Келишимдин 3-бөлүмүндө белгиленген маанилерде колдонулат.

1. Жалпы жоболор

1.1

Ушул Саясат Кыргыз Республикасынын Санарип кодексинин 73-беренесине ылайык Сервис көрсөтүлгөндө жана Сайт иштеген учурда Колдонуучулардын жана башка адамдардын жеке маалыматтарын иштеп чыгуу жөнүндө маалыматтарды камтыйт.

1.2

Жеке маалыматтар камтылган жазуулардын ээси болуп Келишимдин 2-бөлүмүндө көрсөтүлгөн Компания эсептелет.

1.3

Компания жеке маалыматтарды мыйзамдуу, ак ниеттүү жана ачык-айкын иштеп чыгат, алдын ала аныкталган максаттар үчүн гана, зарыл болгон минималдуу көлөмдө жана иштеп чыгуунун максаттары талап кылган мөөнөттөн ашык эмес убакыт ичинде сактайт.

2. Кимдердин маалыматтары иштеп чыгарылат

2.1

Компания төмөнкү адамдардын жеке маалыматтарын иштеп чыгат:

  • а)Колдонуучулардын;
  • б)Колдоо кызматына кайрылган адамдардын, анын ичинде укук ээлеринин жана даттануу берген адамдардын;
  • в)Колдонуучулардын Контентинде маалыматы камтылган үчүнчү жактардын, бирок мындай Контент Сервис аркылуу өткөрүлүп жана сакталган көлөмдө гана.

3. Кандай маалыматтар, кандай максаттар үчүн, кайсы негизде жана канча мөөнөткө сакталат

3.1

Маалыматтардын курамы, кайсы максатта, укуктук негиздери жана сактоо мөөнөттөрү төмөнкү таблицада көрсөтүлгөн. Негиздер Кыргыз Республикасынын Санарип кодексинин 79-беренесинин 1-бөлүгүнө ылайык көрсөтүлгөн: «келишим» - 1-пункт, «мыйзам» - 2-пункт, «мыйзамдуу кызыкчылык» - 5-пункт, «макулдук» - ушул берененин 2-бөлүгү.

МаалыматтарМаксатыНегизиСактоо мөөнөтү
Телефон номериКаттоо, кирү, билдирүүлөрКелишимЭсептик жазуу өчүрүлгөнгө же номер алмашканга чейин; Акцепт жөнүндө жазуулардын курамында Келишим токтотулгандан кийин 3 жыл
Аты, колдонуучу аты, АватарПрофилди түзүү жана башка Колдонуучуларга көрсөтүүКелишимКолдонуучу өзгөрткөнгө же Эсептик жазуу өчүрүлгөнгө чейин
Түзмөктүн дарек китебиндеги телефон номерлери (хэштелген түрдө)Сервисти колдонгон байланыштарды издөөМакулдук (5-тиркеменин 1-формасы)Колдонуучу болуп саналбаган адамдардын номерлери салыштыруу жүргүзүлгөндөн кийин сакталбайт; калган номерлер макулдук кайтарылып алынганга чейин же Эсептик жазуу өчүрүлгөнгө чейин, ушул жагдайлардын кайсынысы эртерээк келип чыкса.
Каналдарга жазылуулар, түзүлгөн Каналдар жана жарыялоолор жөнүндө маалыматтарКаналдардын иштеши, Каналдын Ээси үчүн жекелештирилбеген статистикаКелишимЖазылуу токтотулганга, жарыя же Канал өчүрүлгөнгө чейин
Верификация учурунда алынган маалыматтарИнсанды ырастоо жана Түндүк аркылуу кирүүКелишимВерификация кайтарылып алынганга же Эсептик жазуу өчүрүлгөнгө чейин
Билдирүүлөрдүн мазмуну, сүрөттөр, үн билдирүүлөрү (шифрленген түрдө)Билдирүүлөрдү өткөрүп берүү жана сактооКелишимКолдонуучу өчүргөнгө чейин же Келишимдин 24.3-пунктуна ылайык
Коммуникациялардын метадайындарыБилдирүүлөрдү жеткирүү, чаттардын тарыхы, коопсуздукКелишим; мыйзамдуу кызыкчылыкКелишим колдонулган мезгилде жана токтотулгандан кийин 3 жыл
IP-дарекКоопсуздук, алдамчылыкка каршы аракеттер, Инциденттерди иликтөөМыйзамдуу кызыкчылык1 ай
Түзмөктүн модели, операциялык системанын жана Тиркеменин версиясы, push-билдирүүлөрдүн идентификаторуСервистин иштеши, шайкештик, билдирүүлөрКелишимЭсептик жазуу өчүрүлгөнгө же Түзмөктөн чыкканга чейин
Авторизация аракеттери тууралуу маалыматтарКоопсуздук жана аракеттерди тастыктооМыйзамдуу кызыкчылык; мыйзам3 жыл
ЖИ функцияларына карата сурамдардын саны жана көлөмү (мазмуну сакталбастан)Лимиттер, ЖИ функцияларынын Провайдери менен эсептешүүлөр жана статистикаМыйзамдуу кызыкчылык3 жыл
Кайрылуулар, даттануулар жана аларга тиркелген БилдирүүлөрКайрылууларды жана талаш-тартыштарды карооКелишим; мыйзамКароо аяктагандан кийин 3 жыл
Акцепт, Келишимдин редакциялары, маалыматтар жана кайтарылып алынган макулдуктар жөнүндө жазууларКелишимдин шарттарын жана анын аткарылышын тастыктооМыйзам (Кыргыз Республикасынын Санарип кодексинин 114-беренесинин 4-бөлүгү, 132-беренесинин 3-бөлүгү)Келишимдин колдонулуу мөөнөтү ичинде жана ал токтотулгандан кийин 3 жыл
Төлөм маалыматы (Акы төлөнүүчү функцияларды сатып алууда)Эсептешүүлөрдү жүргүзүү, каражаттарды кайтаруу жана эсепке алууКелишим; мыйзамСалык жана бухгалтердик эсеп жөнүндө мыйзамдарда белгиленген мөөнөттөрдө
Жарнаманы көрсөтүү үчүн маалыматтарЖарнаманы таратууМакулдук (5-тиркеменин 2-формасы)Макулдук кайтарылып алынганга чейин
3.2

Компания Түзмөктүн так жайгашкан жери жөнүндө маалыматтарды (геолокацияны, анын ичинде GPS маалыматтарын) иштетпейт. IP-дарек боюнча аныкталышы мүмкүн болгон болжолдуу жайгашкан жер Компания тарабынан белгиленбейт жана пайдаланылбайт, ушул Саясаттын 3.1-пунктунда көрсөтүлгөн коопсуздукту камсыз кылуу жана алдамчылыкка каршы аракеттенүү максаттарын кошпогондо.

3.3

Эгерде Тиркеменин функцияларында каралган болсо, байланыштарды издөө функциясы Колдонуучунун 5-тиркеменин 1-формасына ылайык берилген макулдугу менен гана иштейт: Түзмөктүн дарек китебиндеги телефон номерлери Компаниянын серверлерине корголгон (хэштелген) түрдө өткөрүлүп берилет жана Сервисти байланыштардын кимдери пайдаланып жатканын көрсөтүү максатында гана колдонулат. Колдонуучу болуп саналбаган адамдардын номерлери, ошондой эле Колдонуучу Тиркемедеги байланыштар тизмесине кошпогон Колдонуучулардын номерлери салыштыруу жүргүзүлгөндөн кийин сакталбайт. Колдонуучу каалаган убакта Тиркеменин жөндөөлөрү аркылуу өзүнүн макулдугун кайтарып алууга укуктуу. Компания маалыматтарды иштеп чыгуунун жаңы түрлөрүн Келишимдин 23-бөлүмүндө белгиленген тартипте Саясатка өзгөртүүлөр киргизилгенден кийин жана зарыл болгон учурда өзүнчө макулдук алгандан кийин гана киргизет. Функциянын иштеши үчүн Түзмөктүн операциялык тутумунун жөндөөлөрүндө дарек китебине жеткиликтүүлүккө уруксат берүү да талап кылынат. Мындай уруксат 5-тиркеменин 1-формасы боюнча берилүүчү макулдукту алмаштырбайт. Колдонуучу аны каалаган убакта Түзмөктүн жөндөөлөрү аркылуу өчүрө алат, мында дарек китебиндеги телефон номерлери Сервиске өткөрүлүп берилбей калат.

3.4

Сактоо мөөнөтү аяктагандан кийин маалыматтар өчүрүлөт же жекелештирилбеген түргө келтирилет. Эгерде маалыматтар талаш-тартышты кароо же Ыйгарым укуктуу органдын мыйзамдуу талабын аткаруу үчүн зарыл болсо, аларды сактоо мөөнөтү көрсөтүлгөн жол-жоболор аяктаганга чейин узартылат.

4. Маалыматтардын өзгөчө категориялары жана балдардын маалыматтары

4.1

Компания жеке маалыматтардын өзгөчө категорияларына кирген маалыматтарды сурабайт жана атайылап иштетпейт. Мындай маалыматтар Колдонуучулардын өз чечими боюнча Билдирүүлөрдүн курамында камтылышы мүмкүн; алар шифрленген түрдө өткөрүлүп берилет жана сакталат жана Компания үчүн Келишимдин 8.3 жана 8.4-пункттарында көрсөтүлгөн учурларда гана жеткиликтүү болот.

4.2

Үн жазуулары жана адамдардын сүрөттөрү жеке адамдарды биометрикалык идентификациялоо үчүн пайдаланылбайт. Тиркемени биометрикалык кулпулоо функциясы колдонулган учурда Компания биометрикалык маалыматтарды албайт: текшерүүнү Түзмөктүн операциялык системасы жүргүзөт.

4.3

14 жаштан 18 жашка чейинки Колдонуучулардын маалыматтары алардын кызыкчылыктарында жана башка Колдонуучулардын маалыматтары менен бирдей көлөмдө иштетилет. Мындай Колдонуучулардын маалыматтары жарнамалык максаттарда пайдаланылбайт. Эгерде Компания Эсептик жазуу 14 жашка чыга элек адам тарабынан түзүлгөнүн аныктаса, ал мындай Эсептик жазууну бөгөттөөгө жана өчүрүүгө укуктуу.

5. Маалыматтар кимдерге өткөрүлүп берилет

5.1

Компания жеке маалыматтарды сатпайт. Маалыматтар төмөндө көрсөтүлгөн жактарга гана жана маалыматтарды иштеп чыгуунун максаттарына жетүү үчүн зарыл болгон көлөмдө гана өткөрүлүп берилет.

АлуучуРолуМаалыматтарӨлкө
«Дататайм» Жоопкерчилиги чектелген коомуИштеп чыгуучу: серверлерди жайгаштырууСервиске тиешелүү бардык маалыматтар (Билдирүүлөр шифрленген түрдө)Кыргыз Республикасы
«ВК Тех Казахстан» Жоопкерчилиги чектелген шериктештигиИштеп чыгуучу: маалыматтардын резервдик көчүрмөлөрүн сактоо жана контентти жеткирүү тармагыСервистин маалыматтарынын резервдик көчүрмөлөрү (Билдирүүлөр шифрленген түрдө сакталат), ошондой эле сүрөттөр жана үн билдирүүлөр аларды жеткирүү учурундаКазакстан Республикасы
«Никита Мобайл» Жоопкерчилиги чектелген коомуИштеп чыгуучу: Ырастоо коддорун жөнөтүүТелефон номери, SMS билдирүүнүн текстиКыргыз Республикасы
«Бидиджитал» Жоопкерчилиги чектелген коомуЖИ функцияларынын Провайдери (Иштеп чыгуучу)ЖИ функциясы колдонулган Билдирүүнүн мазмунуКыргыз Республикасы
«Түндүк» системасынын Оператору Кыргыз Республикасынын Президентинин Иш Башкармалыгына караштуу «Кызмат» Мамлекеттик мекемесиИдентификациялоо системасыВерификация жана Түндүк аркылуу кирүү үчүн зарыл болгон маалыматтарКыргыз Республикасы
Apple Inc., Google LLCPush-билдирүүлөрдү жеткирүү сервистери жана тиркемелер дүкөндөрүPush-билдирүүлөр үчүн идентификатор жана техникалык маалыматтар [тактоо талап кылынат]АКШ
Ыйгарым укуктуу органдарМыйзамдуу талаптарды аткаруу (Келишимдин 8.7-пункту)Мыйзамдуу талапта көрсөтүлгөн көлөмдөКыргыз Республикасы
5.2

Компания ар бир Иштеп чыгуучу менен Кыргыз Республикасынын Санарип кодексинин 86-беренесинин 4-бөлүгүндө каралган шарттарды камтыган келишим түзөт.

5.3

Келишимдин 26.4-пунктунда белгиленген тартипте Келишим боюнча укуктар жана милдеттер өткөрүлүп берилген учурда, маалыматтар Сервистин жаңы кызмат көрсөтүүчүсүнө өткөрүлүп берилет.

6. МАМЛЕКЕТТЕР АРАЛЫК МААЛЫМАТ ӨТКӨРҮҮ

6.1

Маалыматтардын негизги сакталышы Кыргыз Республикасынын аймагында жүзөгө ашырылат. Саясаттын 5.1-пунктундагы таблицада башка өлкө көрсөтүлгөн болсо, маалыматтар төмөнкү учурларда өткөрүлүп берилет:

  • а)эгерде Колдонуучу тарабы болуп саналган Келишимди аткаруу үчүн зарыл болсо (push-билдирүүлөрдү жеткирүү, ЖИ функцияларынын иштеши, контентти жеткирүү);
  • б)жеке маалыматтар субъекттеринин укуктарын коргоонун тийиштүү деңгээлин камсыз кылган чет мамлекеттердин тизмесине киргизилген мамлекеттерге;
  • в)жеке маалыматтар субъекттеринин укуктарын тийиштүү деңгээлде коргоону камсыз кылуучу шарттарды камтыган Иштеп чыгуучу менен түзүлгөн келишимдин негизинде (маалыматтардын резервдик көчүрмөсүн түзүү үчүн).
6.2

Көрсөтүлгөн негиздер Кыргыз Республикасынын Санарип кодексинин 89-беренесинин 2 жана 4-бөлүктөрүндө каралган.

6.3

Чет мамлекеттерге өткөрүлүп берилген маалыматтар аларды кабыл алуучу өлкөнүн мыйзамдарына ылайык иштеп чыгарылат.

6.4

Эгерде Компания маалыматтардын негизги сакталышын Кыргыз Республикасынын аймагынан тышкары жерге көчүрсө, ал Келишимдин 23-бөлүмүндө белгиленген тартипте Саясатка өзгөртүүлөрдү киргизет.

7. МААЛЫМАТТАРДЫ КОРГОО ЖАНА ИНЦИДЕНТТЕР

7.1

Компания төмөнкү коргоо чараларын колдонот:

  • а)Билдирүүлөрдү, Чалууларды жана маалыматтарды өткөрүү каналдарын шифрлөө;
  • б)кызматкерлердин маалыматтарга жеткиликтүүлүгүн чектөө жана эсепке алуу журналдарын жүргүзүү;
  • в)жеке маалыматтарды камтыган жазуулар менен жүргүзүлгөн операцияларды эсепке алуу;
  • г)жеке маалыматтарды иштеп чыгууга жооптуу адамды дайындоо жана кызматкерлерди окутуу;
  • д)тобокелдиктерди башкаруу жана Инциденттерге жооп кайтаруу системасын колдонуу;
  • е)жеке маалыматтарды коргоо боюнча мыйзамдардын тиешелүү корголуу деңгээли үчүн белгиленген талаптарында каралган башка чараларды колдонуу.
7.2

Жеке маалыматтардын сыртка чыгып кеткендиги аныкталган учурда Компания бул тууралуу жеке маалыматтар чөйрөсүндөгү тармактык жөнгө салуучу органга аныкталган учурдан тартып 72 сааттан кечиктирбестен билдирет, ал эми мындай маалыматтын сыртка чыгып кетиши алардын укуктарын бузушу мүмкүн болгон учурда жабыр тарткан Колдонуучуларга негизсиз кечиктирбестен маалымдайт.

8. Жеке маалыматтардын субъектинин укуктары

8.1

Компания жеке маалыматтарын иштеп чыгууга алган ар бир жак төмөнкү укуктарга ээ:

УкукНегизи (Санарип кодекс)Компаниянын жооп берүү мөөнөтү
Өзүнүн маалыматтарынын иштеп чыгуу жөнүндө маалымат алуу73-берененин 1-бөлүгү7 Жумуш күнү
Өзүнүн маалыматтарына же алардын көчүрмөсүнө жеткиликтүүлүк алуу73-берененин 4-бөлүгү7 Жумуш күнү
Маалыматтарды оңдоо же толуктоо75-берене7 Жумуш күнү
Маалыматтарды башка маалымат ээсиине өткөрүп берүү76-берене7 Жумуш күнү
Маалыматтарды өчүрүүнү талап кылуу83-беренеНегиздер болгондо дароо
Маалыматтарды иштеп чыгууга каршы чыгуу84-беренеЖүйөлүү чечим – 7 Жумуш күнү
Маалыматтарды иштеп чыгууга чектөөнү талап кылуу85-беренеБилдирүү – 1 Жумуш күнүнөн кечиктирбестен
Макулдукту кайтарып алуу79-берененин 5-бөлүгү1 Жумуш күнүнөн кечиктирбестен
Автоматташтырылган чечимди адам тарабынан кайра кароону талап кылуу57-берененин 2-бөлүгү7 Жумуш күнү
Компаниянын аракеттерине карата тармактык жөнгө салуучу органга же сотко даттануу84-берененин 3-бөлүгү—
8.2

Сурам Колдоо кызматы аркылуу же Келишимдин 2.1-пунктунун «г» подпунктунда көрсөтүлгөн электрондук почта дареги аркылуу жөнөтүлөт. Компания маалыматтардын чындап эле арыз ээсине таандык экендигин ырастоону талап кылууга укуктуу, мисалы, Эсептик жазуу аркылуу сурам жөнөтүү же Ырастоо кодун киргизүү жолу менен.

8.3

Компания Кыргыз Республикасынын Санарип кодексинин 83-беренесинин 2-бөлүгүндө каралган учурларда, анын ичинде дооматтардан коргонуу үчүн же маалыматтарды сактоо Мыйзамдарда талап кылынган учурда, маалыматтарды өчүрбөөгө укуктуу.

9. Сайт жана cookie файлдары

9.1

Сайтка киргенде анын иштеши үчүн зарыл болгон cookie-файлдар колдонулушу мүмкүн. Аналитикалык жана жарнамалык cookie-файлдар Сайт аркылуу суралуучу келген адамдын макулдугу менен гана колдонулат.

10. Саясатка өзгөртүүлөрдү киргизүү

10.1

Саясатка өзгөртүүлөр Келишимдин 23-бөлүмүндө белгиленген тартипте киргизилет. Макулдук негиз болуп эсептелген маалыматтарды иштеп чыгуу максаттарын өзгөртүү маалыматтар субъектинин жаңы макулдугу алынгандан кийин гана жүргүзүлөт.

2-Тиркеме

Сервисти пайдалануу эрежелери

«BARS» мессенджеринин Колдонуучу келишимине карата. Баш тамга менен жазылган терминдер Келишимдин 3-бөлүмүндө белгиленген маанилерде колдонулат.

1. Жалпы жоболор

1.1

Ушул Эрежелер Сервисте эмнелерди кылууга болбой тургандыгын жана Компания мыйзам бузууларга кандай чара көрөрүн белгилейт. Алар бардык Колдонуучулар үчүн, анын ичинде Топтун Түзүүчүлөрү үчүн милдеттүү болуп саналат.

1.2

Эрежелер бузулган учурда Компания Келишимдин 18-бөлүмүндө каралган чараларды колдонот. Эрежелердин 2-бөлүмүн бузуу Келишимди одоно бузуу болуп эсептелет.

1.3

Компания Колдонуучулардын кат алышууларын окубайт жана өз демилгеси менен текшербейт. Компания эреже бузуулар жөнүндө даттануулардан, Ыйгарым укуктуу органдардын талаптарынан жана алардын мазмунуна жетүүнү талап кылбаган техникалык кыянаттык белгилеринен билет. (мисалы, Билдирүүлөрдүн адаттан тышкары көп саны).

2. Тыюу салынган маалыматтар

2.1

Сервис аркылуу Мыйзамдар боюнча таратууга тыюу салынган маалыматтарды жөнөтүүгө, кайра жөнөтүүгө жана башка жолдор менен таратууга тыюу салынат, анын ичинде:

  • а)балдарга карата сексуалдык зомбулук жана эксплуатация материалдарын, жашы жете электер катышкан порнографиялык материалдарды;
  • б)белгиленген тартипте экстремисттик же террористтик деп таанылган материалдарды, терроризмге жана экстремисттик ишмердүүлүккө чакырыктарды;
  • в)зордук-зомбулукка, массалык башаламандыктарга жана улутуна, динине жана Мыйзамдар менен тыюу салынган башка белгилерге карата кастыкты козутууга чакырыктарды;
  • г)баңги каражаттарын, психотроптук заттарды, курал-жарактарды жана жүгүртүлүшүнө тыюу салынган же чектелген башка буюмдарды сатуу боюнча сунуштарды;
  • д)адам сатууга жана сексуалдык эксплуатацияга тартууга багытталган сунуштарды;
  • е)мамлекеттик сырды түзгөн маалыматтарды;
  • ж)соттун чечими же Ыйгарым укуктуу органдын актысы менен таратууга тыюу салынган маалыматтарды;
  • з)Кыргыз Республикасынын «Жарнама жөнүндө» Мыйзамы менен тыюу салынган жарнамаларды, анын ичинде алкоголдук продукциянын жана энергетикалык суусундуктардын, тамеки жана никотин камтыган продукциянын, кумар оюндары бизнесинин, оккульттук жана мистикалык кызматтардын жарнамаларын;
  • и)Кыргыз Республикасынын маалымат чөйрөсүндөгү мыйзамдары тарабынан таратууга тыюу салынган башка маалыматтарды.
2.2

Сервис аркылуу башка адамдардын укуктарын бузган маалыматтарды таратууга тыюу салынат:

  • а)адамдын ар-намысына, кадыр-баркына же ишкердик беделине шек келтирген маалыматтарды;
  • б)башка адамдардын макулдугусуз алардын сүрөттөрүн, анын ичинде интимдик сүрөттөрүн, мындай макулдук талап кылынган учурларда;
  • в)жеке жашоо жөнүндө маалыматтарды жана алардын катышуучуларынын макулдугусуз башка адамдардын кат алышууларын;
  • г)мыйзамдуу негизсиз башка адамдардын жеке маалыматтарын;
  • д)Мыйзамдар уруксат берген учурларды кошпогондо, укук ээсинин макулдугусуз интеллектуалдык менчик объекттерин;
  • е)адамдын өмүрүнө, ден соолугуна жана мүлкүнө карата коркутууларды.

3. Тыюу салынган аракеттер

3.1

Сервисти пайдаланууда төмөнкү аракеттерге тыюу салынат:

  • а)алуучулардын макулдугусуз көп сандагы адамдарга Билдирүүлөрдү, анын ичинде жарнамалык билдирүүлөрдү жөнөтүүгө (спамга);
  • б)талап кылынган лицензиялар же уруксаттар алынбаган учурда Сервисти ишкердик ишмердүүлүктө пайдаланууга;
  • в)өзүн башка адам, уюм, мамлекеттик орган, Компания же анын Колдоо кызматы катары көрсөтүүгө;
  • г)башка Колдонуучулардан Ырастоо коддорун, сырсөздөрдү, банктык карталардын маалыматтарын жана акча каражаттарын алдоо жолу менен алуу аракеттерине, фишингдик шилтемелерди жана зыяндуу программаларды таратууга;
  • д)башка Колдонуучуларды куугунтуктоого, байланышууну токтотуу тууралуу өтүнүчтөн кийин аларга кайра-кайра жазууга, коркутууга же мазактоого;
  • е)Мыйзамдар боюнча талап кылынган учурда сүйлөшүүнүн башка катышуучуларынын макулдугусуз Чалууларды жаздырууга жана мындай жазууларды таратууга;
  • ж)жасалма интеллект аркылуу түзүлгөн же өзгөртүлгөн реалдуу адамдардын сүрөттөрүн жана жазууларын (дипфейктерди) алардын жасалма экендигин көрсөтпөстөн таратууга;
  • з)Эсептик жазууларды автоматтык түрдө, бөгөттөөнү айланып өтүү үчүн же сатуу максатында түзүүгө;
  • и)башка Колдонуучулардын маалыматтарын (аты-жөнүн, номерлерин, Аватарларын) Сервистен тышкаркы максаттар үчүн чогултууга;
  • к)Сервистин ишине тоскоолдук кылууга, ашыкча жүктөм түзүүгө жана техникалык чектөөлөрдү айланып өтүүгө;
  • л)жашы жете электерди алардын өмүрүнө, ден соолугуна же өнүгүүсүнө коркунуч келтирген аракеттерге тартууга.

4. Топтор үчүн эрежелер

4.1

Топтун Түзүүчүсү төмөнкүлөргө милдеттүү:

  • а)Топко катышууга макул болгон адамдарды гана кошууга жана Топтон чыгып кеткен адамдарды кайра кошпоого;
  • б)Топтун аталышында жана сүрөтүндө тыюу салынган маалыматтарды, башка адамдардын товардык белгилерин жана адаштыруучу белгилерди (мисалы, мамлекеттик органдардын же Компаниянын расмий топторун туураган белгилерди) колдонбоого;
  • в)Топту спам жөнөтүү, массалык жарнама жүргүзүү жана Эрежелердин 2 жана 3-бөлүмдөрүндө көрсөтүлгөн иштер үчүн пайдаланбоого.
4.2

Топтун Түзүүчүсү Келишимге жана Эрежелерге каршы келбеген өзүнүн баарлашуу эрежелерин белгилей алат жана аларды бузган катышуучуларды чыгарып салууга укуктуу. Мындай чечимдерди ал өз атынан кабыл алат жана Компания алар үчүн жоопкерчилик тартпайт.

5. Коопсуздук

5.1

Компаниянын кызматкерлери эч качан Ырастоо коддорун, сырсөз фразаларын жана банктык карталардын маалыматтарын сурашпайт. Компаниянын расмий билдирүүлөрү Тиркемеде көрсөтүлгөн расмий BARS Эсептик жазуусу аркылуу гана жөнөтүлөт.

5.2

Шектүү Билдирүү алынган учурда Колдонуучуга шилтемелерге өтпөө, акча каражаттарын которбоо жана 3-тиркемеде белгиленген тартипте Колдоо кызматына билдирүү сунушталат.

6. Мыйзам бузуу жөнүндө кантип билдирүү керек

6.1

Эрежелердин бузулушу жөнүндө 3-тиркемеде белгиленген тартипте Колдоо кызматына даттануу жөнөтүп, даттануу берилген Билдирүүнү тиркөө же кайра жөнөтүү аркылуу билдирүүгө болот. Даттануу менен бирге Билдирүү берилгенде, арыз ээси Компания даттанууну кароо үчүн анын мазмуну менен таанышууга макул экендигин билдирет.

7. Каналдар үчүн эрежелер

7.1

Каналдын Ээси төмөнкүлөргө милдеттүү:

  • а)Эрежелердин 2-бөлүмүндө көрсөтүлгөн маалыматтарды жайгаштырбоого жана 3-бөлүмүндө көрсөтүлгөн аракеттерди жасабоого;
  • б)мамлекеттик органдардын, уюмдардын, бренддердин же Компаниянын расмий каналдарын туураган, жаңылыштыкка алып келген Каналдын аталышын, сүрөтүн жана сүрөттөмөсүн колдонбоого;
  • в)жарнаманы Кыргыз Республикасынын «Жарнама жөнүндө» Мыйзамынын жана Келишимдин 10.12-пунктунун талаптарын сактоо менен гана жайгаштырууга;
  • г)Жазылуучулардын санын, көрүүлөрдүн жана реакциялардын санын жасалма түрдө көбөйтпөөгө, анын ичинде ботторду жана автоматташтырылган программаларды колдонбоого;
  • д)интеллектуалдык менчик объекттерине болгон укуктарды сактоого жана Мыйзамдар талап кылган учурда пайдаланылган материалдардын булагын көрсөтүүгө;
  • е)мыйзамдуу негизсиз Жазылуучулардын жеке маалыматтарын чогултпоого жана пайдаланбоого.
7.2

Эрежелердин 7.1-пунктун бузуу Келишимдин 18-бөлүмүндө каралган чараларды, анын ичинде Каналга жеткиликтүүлүктү чектөөнү жана аны өчүрүүнү колдонууга негиз болуп эсептелет.

3-Тиркеме

Кайрылууларды, даттанууларды жана талаш-тартыштарды кароонун тартиби

«BARS» мессенджеринин Колдонуучу келишимине карата. Ушул Тартип Кыргыз Республикасынын Санарип кодексинин 119-беренесине ылайык иштелип чыккан. Баш тамга менен жазылган терминдер Келишимдин 3-бөлүмүндө белгиленген маанилерде колдонулат.

1. Кайрылуулардын түрлөрү

1.1

Колдонуучу Компанияга төмөнкүлөрдү жөнөтүүгө укуктуу:

  • а)суроо - Сервистин иштеши боюнча түшүндүрмө берүү өтүнүчү;
  • б)Сервистин сапатына байланыштуу даттануу;
  • в)интеллектуалдык менчик укуктарынын же Санарип укуктардын бузулушу жөнүндө даттануу;
  • г)башка Колдонуучу тарабынан Эрежелердин бузулушу жөнүндө даттануу;
  • д)2-тиркеменин 2-бөлүмүндө көрсөтүлгөн маалыматтарды таратуу жөнүндө даттануу;
  • е)Мыйзамдардын башка бузулуштары жөнүндө даттануу;
  • ж)доомат - Акы төлөнүүчү функцияларга байланыштуу акчалай талап (кайтаруу, кайра эсептөө, чыгымдын ордун толтуруу);
  • з)жеке маалыматтар субъектинин суроо-талабы - 1-тиркеменин 8-бөлүмүндө белгиленген тартипте.

2. Кайрылууну берүү тартиби

2.1

Кайрылуу төмөнкү ыкмалардын бири менен берилет:

  • а)Тиркемедеги «Колдоо» бөлүмү аркылуу;
  • б)Билдирүүдөгү, Эсептик жазуудагы же Топтогу «Даттануу» баскычы аркылуу;
  • в)электрондук почта аркылуу: feedback@bars.kg;
  • г)Келишимдин 26-бөлүмүндө көрсөтүлгөн Компаниянын дарегине кат жөнөтүү аркылуу.
2.2

Кайрылууда төмөнкүлөр көрсөтүлүүгө тийиш:

  • а)арыз ээсинин Эсептик жазуусуна байланыштырылган телефон номери же байланыштын башка ыкмасы;
  • б)кайрылуунун маңызы жана талап;
  • в)даттануу тиешелүү болгон Эсептик жазуу, Топ же Билдирүү;
  • г)интеллектуалдык менчик укуктары бузулгандыгы боюнча даттануу үчүн - укук ээси, объект жана укуктарды ырастоочу документтер жөнүндө маалымат;
  • д)доомат үчүн - төлөмдүн датасы, суммасы жана акча каражаттарын кайтаруу ыкмасы.
2.3

Эгерде кайрылууда аны кароо үчүн зарыл болгон маалыматтар жок болсо, Компания 2 (эки) жумуш күнүнүн ичинде аларды толуктоону суранат. Кароо мөөнөтү жетишпеген маалыматтар алынган күндөн тартып эсептелет.

2.4

Компания Колдонуучулардын кат алышууларын окубайт. Компания Билдирүүнү текшере алышы үчүн арыз ээси аны өзү кайра жөнөтүүгө же экран сүрөтүн тиркөөгө тийиш. Билдирүүнү берүү менен арыз ээси анын катышуучусу экендигин ырастайт жана Компания даттанууну кароо үчүн анын мазмуну менен таанышышына макулдук берет.

3. Кароо мөөнөттөрү

3.1

Компания кайрылуунун алынгандыгын Тиркеме аркылуу берилген учурда автоматтык түрдө дароо ырастайт, ал эми башка учурларда - 1 (бир) жумуш күнүнүн ичинде ырастайт.

3.2

Кароо мөөнөттөрү:

Кайрылуунун түрүЖооп берүү мөөнөтүНегизи
Суроо5 жумуш күнү—
1.1-пункттун «б»-«е» подпункттарындагы даттануулар5 жумуш күнүКыргыз Республикасынын Санарип кодексинин 119-беренесинин 3-бөлүгү
Доомат—Мыйзамдардын талаптарына ылайык
Жеке маалыматтар субъектинин суроо-талабы1-тиркемеге ылайыкКыргыз Республикасынын Санарип кодекси
3.3

Эгерде мыйзам бузууну жоюу үчүн көбүрөөк убакыт талап кылынса, Компания 5 (беш) жумуш күнүнүн ичинде арыз ээсине канча убакыт талап кылынарын жана анын себептерин билдирет.

3.4

Өмүргө жана ден соолукка коркунуч келтирген учурлар, балдарды сексуалдык эксплуатациялоо материалдары боюнча даттануулар жана Эсептик жазуунун бузулушу жөнүндө билдирүүлөр артыкчылыктуу тартипте каралат.

4. Башка Колдонуучуга карата даттанууну кароо тартиби

4.1

Компания даттануу түшкөн Колдонуучуга анын алынгандыгы жөнүндө билдирет жана даттанууга тиешелүү маалыматтарды берет. Даттануу берүү менен арыз ээси буга макулдугун билдирет.

4.2

Даттануу берилген Колдонуучу 2 (эки) жумуш күнүнүн ичинде түшүндүрмө берүүгө укуктуу. Түшүндүрмөнүн жоктугу чечим кабыл алууга тоскоолдук кылбайт.

4.3

Чечим кабыл алынганга чейин Компания кечиктирүү арыз ээсине же үчүнчү жактарга олуттуу зыян келтириши мүмкүн болсо, талаштуу маалыматка же Эсептик жазууга жеткиликтүүлүктү убактылуу чектөөгө укуктуу.

4.4

Кароонун жыйынтыгы боюнча Компания төмөнкү чечимдердин бирин кабыл алат:

  • а)даттанууну канааттандыруудан баш тартуу;
  • б)Келишимдин 18.3-пунктунда каралган негиздер боюнча маалыматты өчүрүү же ага жеткиликтүүлүктү чектөө;
  • в)Колдонуучуга карата Келишимдин 18-бөлүмүндө каралган чараларды колдонуу.
4.5

Компания атайылап жалган жана жаңы жүйөлөрдү камтыбаган кайталанма даттанууларды кароосуз калтырууга, ошондой эле алар системалуу түрдө берилген учурда Келишимдин 18-бөлүмүндө каралган чараларды колдонууга укуктуу.

5. Жооп берүү тартиби

5.1

Жооп арыз ээси башка ыкманы көрсөтпөсө, кайрылуу берилген ошол эле ыкма менен жөнөтүлөт.

5.2

Жоопто төмөнкүлөр көрсөтүлөт: кабыл алынган чечим; анын негизи (Келишимдин же Эрежелердин тиешелүү пункту) жана даттануу тартиби.

5.3

Тиркемеге же арыз ээси көрсөткөн электрондук почта дарегине жөнөтүлгөн жооп жөнөтүлгөн күнү алынган болуп эсептелет.

6. Даттануу тартиби

6.1

Компаниянын чечимине тиешелүү тармактык жөнгө салуучу органда (эгер бар болсо) милдеттүү сотко чейинки тартипте даттанууга болот.

6.2

Эгерде арыз ээси тармактык жөнгө салуучу органдын чечими менен макул болбосо, талаш Келишимдин 25-бөлүмүнө ылайык Компаниянын жайгашкан жери боюнча сотто каралат.

6.3

Акча каражаттарын кайтаруу жөнүндө талап алгач 1.1-пункттун «ж» подпунктуна ылайык доомат түрүндө Компанияга берилет. Доого жооп алынгандан кийин же жооп берүү мөөнөтү өткөндөн кийин сотко кайрылууга болот.

7. Кайрылууларды сактоо

7.1

Кайрылуулар жана алар боюнча жооптор карап чыгуу аяктагандан кийин 3 (үч) жыл бою сакталат жана Компания тарабынан далил катары пайдаланылышы мүмкүн.

4-Тиркеме

Жасалма интеллектти колдонуу жөнүндө маалымат

«BARS» мессенджеринин Колдонуучу келишимине карата. Баш тамга менен жазылган терминдер Келишимдин 3-бөлүмүндө белгиленген маанилерде колдонулат.

1. Жасалма интеллекттин кандай функциялары колдонулат

1.1

Сервисте төмөнкү ЖИ функциялары колдонулат:

ФункцияЭмнени аткаратКандай маалыматтар өткөрүлүп берилетЖИ функцияларынын Провайдери
Үн Билдирүүлөрүн транскрибациялооКепти текстке айлантатҮн Билдирүүсүнүн аудио жазуусу«Бидиджитал» Жоопкерчилиги чектелген коому
Билдирүүлөрдү кыргыз жана орус тилдеринин ортосунда которууТекстти которотБилдирүүнүн тексти«Бидиджитал» Жоопкерчилиги чектелген коому
1.2

ЖИ функцияларынын тизмеси толукталышы мүмкүн. Жаңы ЖИ функциясы жана ЖИ функцияларынын Провайдеринин алмашуусу жаңы функция же жаңы Провайдер колдонула баштаганга чейин ушул Тиркемеде чагылдырылат (Келишимдин 9.7-пункту).

2. ЖИ иштеп жатканын кантип билсе болот

2.1

ЖИ функциялары Колдонуучунун буйругу боюнча («Текстке айландыруу», «Которуу» баскычтарын басуу аркылуу) же Тиркеменин жөндөөлөрүндө каралган болсо автоматтык түрдө иштетилет (Келишимдин 9.1-пункту).

2.2

ЖИнин ишинин натыйжасы Тиркемеде атайын белги менен көрсөтүлөт (мисалы,«ЖИ тарабынан текстке айландырылды»,«ЖИ тарабынан которулду»).

2.3

Транскрибациялоо жана которуу жүргүзүлгөндө Билдирүү шифры чечилген түрүндө ЖИ функцияларынын Провайдерине өткөрүлүп берилет. Иштетүү учурунда мындай Билдирүүгө учтан-учка шифрлөө колдонулбайт. Купуя маалыматтарды камтыган Билдирүүлөргө ЖИ функцияларын колдонбоо сунушталат (Келишимдин 9.8-пункту).

3. Сервистеги ЖИ эмнелерди аткарбайт

3.1

Сервистеги ЖИ:

  • а)Эсептик жазууларды бөгөттөө жөнүндө чечимдерди жана Колдонуучу үчүн укуктук кесепеттерге алып келген башка чечимдерди кабыл албайт;
  • б)адамдардын эмоцияларын тааныбайт жана адамдарды биометрикалык белгилери боюнча классификациялабайт;
  • в)дипфейктерди түзбөйт;
  • г)жарнама максатында кат алышууларды талдабайт.
3.2

Компания Билдирүүлөрдү жасалма интеллект моделдерин окутуу үчүн колдонбойт жана Колдонуучу 5-тиркеменин 4-формасына ылайык өзүнчө макулдук бербесе, ЖИ функцияларынын Провайдерине да мындай пайдаланууга тыюу салат. ЖИ функцияларынын Провайдерине өткөрүлгөн маалыматтар 1-тиркемеде көрсөтүлгөн мөөнөттө иштеп чыгуулардан кийин өчүрүлөт.

4. Натыйжалардын ишенимдүүлүгү

4.1

ЖИ ката кетириши мүмкүн: сөздөрдү туура эмес таанып калышы, маанисин бурмалап коюшу, ысымдарды, сандарды жана терминдерди так эмес которушу мүмкүн. ЖИнин натыйжасы жардамчы мүнөзгө ээ болуп, баштапкы Билдирүүнү алмаштырбайт.

4.2

ЖИнин натыйжаларынын негизинде чечим кабыл алардан мурда аны баштапкы Билдирүү менен салыштырып текшерүү зарыл. Компания мындай текшерүүсүз пайдаланылган ЖИ натыйжаларынын кесепеттери үчүн жоопкерчилик тартпайт (Келишимдин 9-бөлүмү).

5. Коркунуч деңгээлин баалоо

5.1

Сервистеги ЖИ функциялары көмөкчү мүнөзгө гана ээ. Коркунуч деңгээлин баалоонун жыйынтыктары жана баалоо методикасы Кыргыз Республикасынын Санарип кодексинин 193-беренесинин 4-бөлүгүнө ылайык www.bars.kg дарегинде жайгаштырылат.

6. ЖИден кантип баш тартууга болот

6.1

Колдонуучу ЖИ функцияларын колдонбой коюуга жана алардын автоматтык режимин жөндөөлөр аркылуу өчүрүүгө укуктуу. Бул Сервистин башка функцияларын пайдаланууга таасирин тийгизбейт.

6.2

Колдонуучу Билдирүүнүн алуучусуна алынган Билдирүүгө карата ЖИ функцияларын колдонууга тыюу сала албайт (Келишимдин 9.3-пункту). Мындай учурда Билдирүү ушул Тиркеменин 2.3-пунктунда белгиленген тартипте ЖИ функцияларынын Провайдерине өткөрүлүп берилет.

5-Тиркеме

Макулдуктун формалары

«BARS» мессенджеринин Колдонуучу келишимине карата. Баш тамга менен жазылган терминдер Келишимдин 3-бөлүмүндө белгиленген мааниде колдонулат.

Жалпы эрежелер

1

1-4-формалар боюнча макулдуктар Тиркемеде Акцепттен өзүнчө берилет: демейки боюнча өчүрүлгөн өзүнчө которгуч (переключатель) же баскыч аркылуу. Форманын тексти макулдук берилгенге чейин Колдонуучуга көрсөтүлөт.

2

1-4-формалар боюнча макулдук берүүдөн баш тартуу Сервистин негизги функцияларына жеткиликтүүлүктү чектебейт, тиешелүү функция үчүн мындай макулдук талап кылынган учурларды кошпогондо.

3

Макулдук каалаган убакта Тиркеменин жөндөөлөрүндө же Колдоо кызматы аркылуу кайтарылып алынышы мүмкүн. Макулдукту кайтарып алуу ага чейин мыйзамдуу негизде жүргүзүлгөн иштеп чыгуунун мыйзамдуулугуна таасир этпейт.

4

Компания макулдуктун берилгендиги жана кайтарылып алынгандыгы жөнүндө Санарип жазууларды (күнү, убактысы, форманын текстинин редакциясы, Эсептик жазуунун идентификатору) макулдук күчүндө болгон мезгил ичинде жана ал токтотулгандан кийин 3 (үч) жыл бою сактайт.

1-Форма. Байланыштарды синхрондоштурууга макулдук

Мен BARS тиркемесине Түзмөгүмдүн дарек китебиндеги телефон номерлерин текшерүүгө уруксат берем, бул менин байланыштарымдын кимдери BARS кызматын пайдаланарын көрсөтүү үчүн зарыл. Номерлер Компаниянын серверлерине корголгон (хэштелген) түрдө өткөрүлүп берилет, ушул максат үчүн гана колдонулат жана үчүнчү жактарга берилбейт.

Мен бул номерлерди өткөрүп берүүгө укугум бар экенин ырастайм. Мен макулдугумду жөндөөлөр аркылуу кайтарып ала алам; макулдук кайтарылып алынгандан кийин жүктөлгөн номерлер өчүрүлөт.

Форма байланыштарды издөө функциясы биринчи жолу колдонулган учурда, кандайдыр бир номерлер өткөрүлүп берилгенге чейин көрсөтүлөт. Макулдук берилбесе дагы Колдонуучу байланыштарды колдонуучу аты жана QR-код аркылуу кошо алат.

2-Форма. Жарнамаларды алууга макулдук

Мен BARS тиркемесинде Компаниянын жана анын өнөктөштөрүнүн жарнамаларын алууга макулмун: Тиркеменин интерфейсиндеги баннерлерди, BARS расмий Эсептик жазуусунан келген жарнамалык билдирүүлөрдү жана push-билдирүүлөрдү (Кыргыз Республикасынын Санарип кодексинин 132-беренесинин 3-бөлүгү). Жарнамаларды тандоо үчүн менин тилим, аймагым жана Сервисти пайдалануу жөнүндө маалыматтар колдонулушу мүмкүн.

Бул максатта менин Билдирүүлөрүмдүн жана Чалууларымдын мазмуну колдонулбайт. Мен жарнамалардан каалаган убакта жөндөөлөр аркылуу баш тарта алам.

3-Форма. Жеке маалыматтарды чек ара аркылуу өткөрүп берүүгө макулдук

Менин Сервистеги маалыматтарым Кыргыз Республикасынын аймагында жайгашкан серверлерде сакталат. Алардын сакталышын камсыз кылуу жана Сервистин ыкчам иштеши үчүн Компания Казакстан Республикасында жайгашкан «ВК Тех Казахстан» Жоопкерчилиги чектелген шериктештигинин серверлерин пайдаланат:

а)маалыматтардын резервдик (камдык) көчүрмөлөрүн сактоо үчүн, алар негизги серверлер үзгүлтүктүн, авариянын же башка Инциденттин натыйжасында иштен чыккан учурда Сервистин маалыматтарын калыбына келтирүү үчүн гана колдонулат;

б)сүрөттөрдү жана үн билдирүүлөрдү алардын алуучуларына контентти жеткирүү тармагы (CDN — Content Delivery Network) аркылуу тездетилген тартипте жеткирүү үчүн.

Мен өзүмдүн маалыматтарымды (Эсептик жазуунун маалыматтарын, Метадайындарды, Билдирүүлөрдү, сүрөттөрдү жана үн билдирүүлөрдү) ушул пункттун «а» пунктчасында көрсөтүлгөн максаттар үчүн өткөрүп берүүгө макулдугумду берем. Резервдик көчүрмө шифрленген түрдө сакталат; «ВК Тех Казахстан» ЖЧШсы маалыматтарды башка максаттарда пайдаланууга жана аларды үчүнчү жактарга өткөрүп берүүгө укуктуу эмес.

Мага Казакстан Республикасында жеке маалыматтарды коргоо деңгээли Кыргыз Республикасында белгиленген деңгээлге ылайык келбеши мүмкүн экендиги жана анын аймагында жайгаштырылган маалыматтар Казакстан Республикасынын мыйзамдарына ылайык иштетилери жөнүндө маалымат берилди.

Бул форма маалыматтарды чет өлкөгө өткөрүп берүү үчүн 1-Тиркеменин 6-бөлүмдө көрсөтүлгөн башка укуктук негиздер жок болгон учурларда гана колдонулат (Кыргыз Республикасынын Санарип кодексинин 89-беренеси).

4-Форма. ЖИ функцияларын жакшыртуу үчүн маалыматтарды пайдаланууга макулдук

Мен өзүм ЖИ функцияларын колдонгон үн Билдирүүлөр жана тексттер, ошондой эле аларды иштеп чыгуунун натыйжалары Компания жана ЖИ функцияларынын Провайдери тарабынан транскрибациялоонун жана котормонун сапатын жакшыртуу үчүн, анын ичинде жасалма интеллект моделдерин окутуу максатында, менин инсандыгымды аныктоого мүмкүндүк берген маалыматтар (Телефон номери, аты-жөнү, Эсептик жазуунун идентификатору) өчүрүлгөндөн кийин пайдаланылышына макулмун. Мен макулдугумду жөндөөлөр аркылуу кайтарып ала алам; макулдук кайтарылып алынгандан кийин жаңы маалыматтар бул максаттар үчүн пайдаланылбайт.